Astanada qatty jel turǵyndardy ábigerge salyp jatyr
ASTANA. KAZINFORM – Kesheden beri elordada qatty jel soǵyp, qolaısyz aýa raıy qala turǵyndaryn ábigerge saldy.
Qatty jeldiń ekpininen adamdar ushyp kete jazdady, áleýmettik jelide taraǵan vıdeolardan qarasaq, keıbir ǵımarattardyń shatyry, qabyrǵalary men qorshaýlary qulaǵan.
«Oqıǵa ornyna aýdandyq tótenshe jaǵdaılar ınspektorlary shyqty. Aýa raıynyń qolaısyzdyǵynan bolǵan jaǵdaıdy rastap, belgilep jatyr. Al shatyrdyń qulaǵan bólshekterin Astana-Tazalyq jumysshylary jınady», - degen habar aldyq qalalyq Tótenshe jaǵdaılar departamentinen.
Aıta ketsek, ázirge qatty jelden zardap shekken adamdar týraly aqparat joq, osy oraıda TJD qosymsha aqparat beriletinin aıtty.
Sondaı-aq, búgin (7 qarasha) aýa raıynyń qolaısyzdyǵyna baılanysty ekinshi aýysymnyń 0-9 synyp oqýshylary qashyqtan oqytý formatyna aýystyryldy. Bul týraly qalalyq bilim basqarmasy habarlady.
Ákimdiktiń málimetinshe, kommýnaldyq qyzmetter kúsheıtilgen rejımde jumys istep jatyr.
«Tańerteń qala kóshelerin qardan tazartýǵa 2000-nan astam jol jumysshysy men 750-ge jýyq arnaıy tehnıka shyqty. Birinshi kezekte ortalyq kóshelerde, jolaýshylar kóligi marshrýttarynda, aıaldamalar men trotýarlarda tazalaý jumystary júrgizilýde. Qalada birneshe jabdyqtalǵan qar polıgondary bar. Onda samosval tehnıkasynyń nómirlik belgilerin oqý júıesimen jabdyqtalǵan, beınebaqylaý kameralary ornatylǵan, jaryqtandyrý qosylǵan», - deıdi elorda ákimdiginen.
«Qazgıdromet» RMK málimetinshe, 7 qarashada Astanada qar, kóktaıǵaq jáne boran bolady. Sınoptıkter ońtústik-batystan 23-28 m/s, keıde 30 m/s deıin jel soǵady dep boljap otyr.
Osy oraıda qala basshylyǵy elorda turǵyndary men qonaqtarynan joldarda abaı bolýdy, qaýipsizdik erejelerin saqtaýdy, daýyldy eskertý bolǵan jaǵdaıda alys saparlardan bas tartýdy suraıdy.
Aqtóbe oblysynda borandy túnde dalada qalǵan 5 adam qutqarylǵanyn jazdyq.
