Astanada boran saldarynan turǵyn úıdiń qasbeti qulap tústi
ASTANA. KAZINFORM — 11 naýryz kúni shamamen saǵat 17:00–de qatty daýyl saldarynan «Aıka» turǵyn úı kesheniniń qasbetindegi jylýoqshaýlaǵysh qabattyń bir bóligi ajyrap tústi, dep habarlaıdy Astana qalasy Turǵyn úı jáne turǵyn úı ınspektsııasy basqarmasy.
Áleýmettik jelide taraǵan vıdeoda turǵyn úıdiń qasbeti boran saldarynan birinen keıi biri julynyp, qulap jatqany baıqalady. Basqarma málimetinshe, atalǵan úı 2015 jyly ǵana paıdalanýǵa berilgen.
— Oqıǵa saldarynan zardap shekkender joq. Qazirgi ýaqytta turǵyn úı kesheniniń basqarýshy kompanııasy qalpyna keltirý jumystarynyń qunyn eseptep jatyr. Sondaı-aq qasbetti jóndeý úshin ónerkásiptik alpınıst jaldaý máselesi qarastyrylady, — delingen vedomstvo habarlamasynda.
Mamandardyń sózinshe, Qazaqstan Respýblıkasynyń «Turǵyn úı qatynastary týraly» Zańynyń 34-babyna sáıkes, páter ıeleri kondomınıýmǵa tıesili ortaq múlikti kútip-ustaý shyǵyndaryn kóterýge mindetti.
— Zańnyń 2-babynyń 2-tarmaǵyna sáıkes ortaq múlikke ǵımarattyń qasbetteri, kireberister, vestıbıýlder, holldar, dálizder, baspaldaq alańdary men marshtary, lıftiler, shatyrlar, kireberis toptarynyń qalqalary (kozyrek), shatyr asty bólmeleri, tehnıkalyq qabattar, jertóleler, sondaı-aq úıge ortaq ınjenerlik júıeler men jabdyqtar jatady, — dep atap ótti basqarmadaǵylar.
Eske salsaq, byltyr qarasha aıynda Astananyń Almaty aýdanynda, Táýelsizdik dańǵyly, 24B mekenjaıynda toǵyz qabatty turǵyn úıdiń qasbetinen kirpishten jasalǵan syrtqy qaptama men kondıtsıoner qondyrǵysy qulap, bes adam zardap shekkenin jazǵan bolatynbyz.
Sol oqıǵa kezinde qasbettiń kirpish qaptamasy qulap, jaraqat alǵan feldsher kóz jumdy.