Astanada qaterli onkologııalyq aýrýmen aýyratyndardyń sany azaıyp keledi
ASTANA. QazAqparat - Astana qalasynda 2-11 aqpan aralyǵynda medıtsınalyq mekemelerde Dúnıejúzilik qaterli isikke qarsy kúres kúni aıasynda onkologııalyq aýrýlardy erte anyqtaý jáne aldyn alý boıynsha on kúndik ótti.
On kúndik sheńberinde Onkologııalyq dıspanserde birqatar is-sharalar ótkizildi: kontsertter, kórmeler. Olardyń basty maqsaty - qaterli isikke shaldyqqan jandarǵa qol ushyn sozý.
2015 jyldyń 2 aqpanynda Aýǵanstan aýmaǵynan Keńes áskeriniń shyǵarylýyna 26 jyl tolýyna oraı Onkologııalyq dıspanserde "Ardager saýlyǵy" atty aktsııa ótip, ınternatsıonalıst-jaýyngerlerdiń jáne olardyń otbasy músheleriniń densaýlyǵy tekserildi.
Bastapqy medıtsınalyq-sanıtarlyq kómek kórsetý mekemeleri men onkodıspanserde Ashyq esik kúnderi ótip, turǵyndar kókeıdegi saýaldaryna osy sala mamandarynyń tarapynan jaýap ala aldy.
Astana qalasynyń bas onkology Muhtar Tóletaevtyń málimetinshe, 2014 jyly elordada onkologııalyq aýrýlardyń kórsetkishteri 100 myń turǵynǵa shaqqanda 165,8, al 2013 jylǵy málimetterge súıensek, 100 myń turǵynǵa shaqqanda 172,3 quraǵan.
Búgingi kúni otandyq densaýlyq saqtaý mekemeleri biregeı dıagnostıkalyq tehnologııalarǵa ıe, qaterli isikke qarsy kúres jolynda patsıenttiń tolyq emdelýine múmkindik bar. Profılaktıkalyq medıtsınalyq tekserýler onkologııalyq aýrýdyń aldyn alýdaǵy birden-bir shara.
