Astanada qaterli isiktiń Dúnıejúzilik kúnine oraılastyrylǵan is-sharalar ótýde
ASTANA. 4 aqpan. QazAqparat - 4 aqpanda jyl saıyn Dúnıejúzilik qaterli isikke qarsy kúres kúni atalyp ótiledi. Osyǵan baılanysty 2013 jylǵy aqpannyń 1-i men 10-y aralyǵynda elordada qaterli isikti erte kezeńde anyqtaýdy aldyn alýdyń onkúndigi ótkizilýde. Bul týraly qalanyń Densaýlyq saqtaý basqarmasy málim etti.
Elordanyń resmı saıtynyń jazýynsha, dúnıejúzilik kún men onkúndiktiń maqsaty halyqtyń jáne jumys berýshilerdiń nazaryn osy basty máselege aýdarý bolyp tabylady. Oǵan qosa, turǵyndar, jumys berýshiler men medıtsına qyzmetkerleri qaterli isikti erte bastan anyqtaý úshin aldyn alý is-sharalaryn ótkizip, anyqtalǵan naýqastardyń ýaqytynda emdelýine jaǵdaı jasaý.
Onkologııalyq aýrýlardan ólim-jitimdi azaıtý densaýlyq saqtaýdyń 2011-2015 jyldarǵa arnalǵan «Salamatty Qazaqstan» Memlekettik Baǵdarlamasy men Qazaqstan Respýblıkasyndaǵy 2012-2016 jyldarǵa arnalǵan onkologııalyq kómek berýdi damytý baǵdarlamasynda maqsatty mindetter negizinde qarastyrylǵan.
Búgingi kúni elordada jatyr moıny, sút bezi jáne toq shek qaterli isikterin anyqtaý baǵytynda skrınıngtiń birneshe túrleri ótkizilýde. Qalalyq Densaýlyq saqtaý basqarmasynyń málimeti boıynsha, 2013 jyly Astana qalasynda kezeń-kezeńimen skrınıngtiń jańa túri: óńesh, asqazan, baýyr, qýyq asty bezderiniń qaterli isikterin anyqtaý qolǵa alynýda.
