Astanada qaterli isikpen jáne týberkýlezben aýyratyndar sany tómendegen
ASTANA. QazAqparat - Astanada qaterli isikpen jáne týberkýlezben aýyratyndar sany tómendegen. Bul týraly Astana qalasy ákimdiginiń medıa ortalyǵynan habarlandy.
Ortalyq málimetterine qaraǵanda, elordada turǵyndar arasynda taraǵan aýrýlarmen baılanysty jaǵdaı ońalǵandyǵyna qaramastan munda birqatar problemalar da joq emes. Solardyń biri qaterli isik aýrýlarynyń kesh anyqtalýymen baılanysty bolyp otyr.
2016 jyldyń osy kezeńimen salystyrǵanda qaterli isiktermen syrqattanýshylar sany 18 %-ǵa tómendep, 100 myń halyqqa shaqqanda 2016 jyly 215,9 bolsa, 2017 jyly bul kórsetkish 176,8-di quraǵan. Astana qalasynda qaterli isikpen syrqattanýshylardyń qaıtys bolýy byltyrǵymen salystyrǵanda 17,4 % tómendep, 100 myń halyqqa shaqqanda 2016 jyly 76,5 bolsa, 2017 jyly 92,6 bolǵan. I-II satydaǵy qaterli isiktermen syrqattanýshylardy anyqtaý boıynsha osy jyldyń 9 aıyndaǵy jaǵdaı 1,2 %-ǵa jaqsarǵan.
Dárigerlerdiń aıtýynsha, kórsetkishterdiń kóńilge qonymdy bolǵanyna qaramastan, basty másele rakpen syrqattanýshylardyń dárigerge óte kesh qaralýymen baılanysty bolyp otyr.
«Qaterli isikterdiń kesh anyqtalý sebebi - syrqattanýshylardyń óz densaýlyǵyna nemquraıly qaraýy (osyndaı jaǵdaılardyń úlesi 25,6 % qurady) jáne dárigerge kesh qaralýy (úles 25,2% qurady) bolyp otyr. Basqa qalalardan kelip, aýrýdyń asqynǵan kezinde dárigerge júgingen patsıentterdiń paıyzdyq kórsetkishi 19,2», - dep atap ótti Astana qalasy densaýlyq saqtaý basqarma basshysynyń orynbasary Tımýr Muratov.
Onyń sózinshe, onkologııalyq patologııalardy ýaqtyly anyqtaýda skrınıgtik zertteýlerdiń mańyzy zor. Qazaqstan Respýblıkasynyń týberkýlezge qarsy kúres jónindegi Ulttyq baǵdarlamasynyń sheńberinde Astana qalasy ákimdiginiń qoldaýymen jáne densaýlyq saqtaý basqarmasynyń keshendi sharalardy iske asyrýyna baılanysty týberkýlezge shaldyqqandar sany jyl saıyn tómendeýde.
9 aıdyń qorytyndysy boıynsha týberkýlezben syrqattanýshylar 1,6% - ǵa, taralýy 10,4% - ǵa tómendegen.
