Astanada qaterli isik aýrýynyń deńgeıi tómendedi
ASTANA. 14 naýryz. QazAqparat - Astanada qaterli isikpen aýratyndar deńgeıi tómendedi. Búgingi kúni ol 100 myń adamǵa shaqqanda 169,4-ti quraıdy. Bul 2011 jylmen salystyrǵanda 3,2%-ǵa (100 myń adamǵa 175,1) az. Sonymen qatar ol respýblıkadaǵy ortasha kórsetkishten de (100 myń adamǵa 188,4) tómen. Bul týraly qalalyq Densaýlyq saqtaý basqarmasy málim etti.
Elordalyq medıtsına qyzmetkerleriniń aıtýynsha, qaterli isikten ólim-jitim 2012 jyly 0,5%-ǵa tómendep, 100 myń adamǵa shaqqanda 81,3-ti qurady.
Sondaı-aq, Basqarmanyń málimeti boıynsha, onkologııalyq aýrýlardy erte kezeńinde anyqtaý múmkindigi ulǵaıdy. Ol 2011 jylǵy 49,5 %-dyń ornyna 53,9%-dy qurady.
Elordanyń resmı saıtynyń jazýynsha, mundaı nátıjelerge qala turǵyndarynyń arasynda skrınıng júrgizýdiń arqasynda qol jetkizildi. Astanada tegin negizde tekserýdiń 10 túri júrgiziledi. Olardyń 3-ýi: sút bezi, jatyr moıyny qaterli isigi, tik shek isigi sııaqty onkologııalyq aýrýlardy erte kezeńinde anyqtaý bolyp tabylady.
Vedomstvodan habarlaǵanyndaı, halyqaralyq standarttarǵa sáıkes mammografııalyq sýretterdi muraǵattaýdyń elektrondy bazasyn jasaý úshin búgingi kúni emhanalardyń barlyq mammograftaryn tizimdeý jumystary aıaqtalyp qaldy.
Eske salaıyq, 2012 jyly naýryzda qalalyq onkologııalyq dıspanser bazasynda 10 tósektik balalar onkologııasy ashylǵan bolatyn. Ótken jyly onda 35 bala emdeldi. Buryn onkologııalyq aýrýmen aýratyn balalar Almaty qalasyna jiberiletin.
2012 jyly elordanyń 15 onkology Ońtústik Koreıa (10), Izraıl, Ulybrıtanııa, Latvııa, Belarýs pen Reseı sııaqty alys jáne jaqyn shetelde biliktiligin jetildirdi. Óz kezeginde sheteldiń onkologııa salasyndaǵy jetekshi mamandyry qalalyq onkodıspanser bazasynda 10 sheberlik-dárisin ótkizip, 6 ota jasady.
