Astanada qaterli isik aýrýlaryna shaldyǵý boıynsha birinshi orynda sút bezi isigi tur
ASTANA. 10 aqpan. QazAqparat /Gúlmıra Álıakparova/ - 2009 jyly Qazaqstanda qaterli isik aýrýlaryna shaldyǵýshylyq alǵash ret qan aınalym júıesi aýrýlarynan keıingi ekinshi orynǵa shyqty.
Bul týraly búgin Astana qalasy ákimdiginde ótken dóńgelek ústel otyrysynda málim boldy.
Densaýlyq saqtaý basqarmasy bastyǵynyń orynbasary Laýra Ahmetnııazovanyń aıtýynsha, qaterli aýrýlardyń beleń alý úrdisi búkil dúnıejúzinde oryn alyp otyrǵan kórinis. Qazaqstanda 2010 jyly qaterli isikke shaldyǵý kórsetkishinde tómendeý úderisi baıqalǵanymen, ony bastapqy satyda anyqtaý áli de kemshin túsip otyr. Onymen birge, 2010 jyly Astana qalasynda onkologııalyq aýrýlardan bolǵan ólim-jitim statıstıkasy azdap óskeni baıqaldy. Atap aıtqanda, 2009 jyly 100 myń adamǵa shaqqanda- 85, 2010 jyly 86,2 boldy. Respýblıkalyq kórsetkish 107,4-ti quraıdy. Osy oraıda, ótken jyly qaterdiń keń taraǵan túrleri - jatyr moıny men sút bezi isikterin anyqtaý úshin Onkologııalyq dıspanserdiń bazasynda mammologııalyq jáne skrınıngtik ortalyqtar ashyldy.
Al Astananyń bas onkolog dárigeri Muhtar Tóleýtaevtyń málimetinshe, elordada túrli qaterli isik aýrýlaryna jyl saıyn 1000-nan astam adam shaldyǵady, 500-den astamy kóz jumady.
«Sońǵy bes jyldaǵy statıstıkalyq málimetterden qaterdiń qurylymy men ereksheliginiń ózgergenin kórýge bolady. 2010 jyly onyń aldyńǵy jylmen salystyrǵanda naýqastaný kórsetkishi azdap tómendegeni baıqaldy. 2009 jyly ol 100 myń adamǵa shaqqanda - 191, 3 bolsa, 2010 jyly 187,9 qurady», - dedi ol.
M.Tóleýtaev atap kórsetkendeı, Astana qalasynda qaterli isik aýrýlaryna shaldyǵý boıynsha birinshi orynda - sút bezi isigi (100 myń adamǵa shaqqanda - 11,9), ekinshi orynda - ókpe (8,8,), úshinshide asqazan isigi (7,3) tur. Al ólim-jitim boıynsha birinshi orynda - ókpeniń qaterli isigi, ekinshide - asqazan, úshinshide - sút bezi aýrýlary.
Dóńgelek ústel otyrysyna qatysqan Astananyń dárigerleri, durys tamaqtaný, salaýatty ómir saltyn belsendi júrgizý, temeki shegýden bas tartý, depressııalyq jaǵdaılardy boldyrmaý, ýltrakúlgin sáýleleri bar solıarıılerdi qoldanbaý - onkologııalyq aýrýlardyń 40 paıyzynyń aldyn alýǵa septigin tıgizetinin aıtty.
