Astanada kassatsııalyq sottyń saltanatty ashylý rásimi ótti
ASTANA. KAZINFORM - Qazaqstan astanasynda Joǵarǵy Sot tóraǵasy Aslambek Merǵalıev pen QR Prezıdentiniń quqyqtyq máseleler jónindegi kómekshisi Erjan Jıenbaevtyń qatysýymen kassatsııalyq sottyń saltanatty ashylý rásimi ótti. Bul týraly Joǵarǵy sottyń baspasóz qyzmeti málimdedi.
Іs-sharaǵa sondaı-aq Joǵarǵy sottyń sot alqalarynyń tóraǵalary Nurserik Sháripov, Nazgúl Rahmetýllına jáne Aslan Túkıev, sondaı-aq Sot ákimshiliginiń basshysy Naıl Ahmetzakırov qatysty. Saltanatty rásimge qatysýshylarǵa quttyqtaý sózinde A.Merǵalıev Memleket basshysy Sýdıalardyń IX sezinde sot tóreligine qoljetimdilikti keńeıtýge, ınvestıtsııalar men bıznesti júrgizýge qolaıly jaǵdaı jasaýǵa, sondaı-aq ádilettilik jáne zań ústemdigi qaǵıdattaryn júzege asyrýǵa baǵyttalǵan sot reformasynyń mańyzdylyǵyn erekshe atap ótkenine toqtaldy.
Bul reformanyń negizgi elementi kassatsııalyq sottardy engizý boldy. Joǵarǵy sot tóraǵasynyń aıtýynsha, kassatsııalyq satynyń ashylýy sot júıesi damýynyń jańa kezeńin bildiredi jáne memlekettiń sot tóreliginiń joǵary standarttaryn qamtamasyz etýge umtylysyn aıǵaqtaıdy.
Memleket basshysynyń Jarlyǵymen jańadan taǵaıyndalǵan kassatsııalyq sottar tóraǵalar: azamattyq ister boıynsha – Asqar Smaıylov, qylmystyq ister boıynsha – Aqan Jumaǵulov, ákimshilik ister boıynsha – Berik Nájimıdenov sot korpýsyna tanystyryldy.
Joǵarǵy Sot tóraǵasy kassatsııalyq sottar elimizdegi «Zań men tártip» irgeli qaǵıdatyn bekite otyryp, zań ústemdigin qamtamasyz etýdiń tıimdi býynyna aınalatynyna senim bildirdi. Resmı is-sharadan keıin qatysýshylar azamattyq jáne qylmystyq ister jónindegi kassatsııalyq sottar ǵımarattarynyń tusaýkeserimen tanysty, sondaı-aq ákimshilik ister jónindegi kassatsııalyq sottyń keńseleri: front-ofısti, sot otyrysy zaldaryn, sýdıalar, prokýror, medıator, advokat jáne oqý ortalyǵyn qarap shyqty. Odan keıin A.Merǵalıev pen E.Jıenbaev kassatsııalyq satylardyń sýdıalar quramymen jumys keńesin ótkizdi, onyń barysynda basymdyqtar aıqyndalyp, naqty mindetter belgilendi.
Sol kúni sot ákimshiliginiń basshysy N.Ahmetzakırov kassatsııalyq sottar departamentiniń ujymyna onyń jańa basshysy – buryn Sot ákimshiliginiń Almaty qalasy boıynsha departament basshysy bolǵan Erjan Qojahmetovti tanystyrdy.
Elimizde kassatsııalyq sottar jumysyn bastaǵanyn jazǵan edik.