Astanada kásiporyn kólikteriniń qozǵalysyna ruqsat alý avtomattandyryldy
NUR-SULTAN. QazAqparat - Nur-Sultanda shaǵyn jáne orta bıznes ókilderi úshin kólik qozǵalysyna ótinim berý avtomattandyryldy, dep habarlaıdy QazAqparat.
«Ótinimdi msb.iqala.kz portalyna kompıýter nemese noýtbýk arqyly ǵana bere alasyz. Zańdy tulǵanyń elektrondyq tsıfrlyq qoltańbasy qajet. Sondaı-aq mynadaı mınımaldy málimetter jıyntyǵy qajet: uıymnyń bıznes-sáıkestendirý nómiri (BSN), júrgizýshiniń / jolaýshynyń JSN-y, avtokóliktiń tirkeý nómiri, baılanys telefony, elektrondyq poshtasy jáne qozǵalys maqsaty», – delingen ákimdik habarlamasynda.
Portal arqyly bir kompanııa úsh ótinimge deıin bere alady. Olardyń árqaısynda tórt avtokólikten kóp emes jáne ár avtokólike on qyzmetke deıin málimet berýge bolady. Ótinishter qalalyq jedel shtabta qaralyp, «Sergek» júıesine jiberiledi.
«Sergek» júıesinen málimet alynǵannan keıin ótinish berýshiniń elektrondyq poshtasyna ótinishti qaraý nátıjesi týraly habarlama jiberiledi. «iQala» qalalyq qyzmet kórsetý ortalyǵy memlekettik qyzmet kórsetýdi jeńildetý jáne avtomattandyrý maqsatynda qurylǵan. Búgingi tańda iqala.kz portalynda Nur-Sultan qalasynyń túrli uıymdarynyń jeke jáne zańdy tulǵalaryna arnalǵan 129 qyzmet túri qoljetimdi», - dedi ákimdikten.
