Astanada kásipqoı boks týrnıri ótedi
ALMATY. 10 qyrkúıek. QazAqparat - Astanada 27 qyrkúıekte kásipqoı boks týrnıri ótedi. Onda jartylaı orta salmaqtaǵy Roman Jaılaýov Qanat Artenbaevpen, Farhad Ospanov Jandos Jetpisbaevpen, aýyr salmaqtaǵy ózbekstandyq Elıor Gýlamov reseılik Maksım Maslovpen kúsh synasady. Al sýper-jeńil salmaqtaǵy Murat Nurqasymov pen jartylaı aýyr salmaqtaǵy Qanat Ábdirahmanovtyń qarsylastary ázirge belgisiz bop tur.
12 raýndtyq bul dodada Roman men Qanat Azııa boks keńesi Panazııalyq boksshylar qaýymdastyǵynyń (PABA) jáne Qazaqstannyń chempıony ataqtaryn sarapqa salady. Roman buǵan deıin 9 kezdesý ótkizip bárin (jeteýin nokaýtpen) óz paıdasyna sheshse, Qanat 17 kezdesýdiń 10-ynda utyp, beseýinde utylyp, ekeýinde teń túsken bolatyn. 2012 jyldan beri kásipqoı boksta óz baǵyn synap júrgen Roman, oǵan deıin áýesqoı boksta 68 kezdesý ótkizip, onyń 62-sinde jeńiske jetken. 26 mamyrda RAVA chempıony atanǵan ol tuńǵysh ret óz ataǵyn qorǵamaq. Al 2005 jyldan beri kásipqoı boks rınginde óner kórsetip júrgen Qanat 2007 jyly Azııa boks keńesiniń chempıony, 2008 jyly Búkilálemdik boks keńesiniń (WBC) qurlyqaralyq chempıony, al 2009 jyly RAVA chempıony ataǵyn ıelengenimen, 2010 jyly Eýroodaqqa kirmeıtin elderdiń EBU-EE nusqasy boıynsha chempıon ataǵy úshin bolǵan jekpe-jekte jeńilis tapqan edi.
12 raýndtyq Elıor men Maksımniń jekpe-jeginde Azııa boks keńesiniń chempıony ataǵy sarapqa salynady. E.Gýlamov 2010 jyldan beri 10 kezdesý ótkizip 8-in (jeteýi nokaýtpen) utyp, 1-eýinde jeńilip, 4-maýsymdaǵy sońǵy saısynda teń túsken. M.Maslov ta 11 kezdesýde utyp (8-i nokaýtpen) 1-eýinde utylyp, 1-eýinde teń túsken. 10 raýndtyq bul synda Farhad pen Jandos bolsa Qazaqstan chempıony ataǵyna talaspaq. Farhad 4 kezdesýde utyp, 2-ýinde jeńilse, Jandos 6 kezdesýde utyp, 6 kezdesýde utylǵan. 2012 jyldan beri kásipqoı boksta 3 kezdesý ótkizip, qarsylastarynyń bárin nokaýtpen utqan AQSh-ta turatyn qazaqstandyq Baqtııar Eıýbov úshin bul 6 raýndtyq tuńǵysh kezdesýi bolmaq. Al Murat Qasymov pen Qanat Ábdirahmanov úshin 4 raýndtyq bul saıys kásipqoı boks rıngindegi tuńǵysh jekpe-jekteri bolmaq.
