Astanada kásipkerlerge qyzmet kórsetý ortalyǵy ashylady
ASTANA. QazAqparat - Elordada Kásipkerlerge qyzmet kórsetý ortalyǵy ashylady. Bul týraly búgin qala halqynyń aldynda esep bergen Astana ákimi Baqyt Sultanov aıtty, dep habarlaıdy QazAqparat tilshisi.
«Mamyrda jobalardy júzege asyrý úshin qajetti qarajat pen memlekettik qyzmetterdi alýda bıznes úshin protsesterdi barynsha jeńildetetin Kásipkerlerge qyzmet kórsetý ortalyǵyn ashýdy josparlap otyrmyz. Kásipkerler «bir terege» prıntsıpi boıynsha jobaǵa tolyqtaı qoldaý men barlyq qyzmet túrlerin ala alady», - dedi Baqyt Sultanov.
Onyń dereginshe, búginde elordada 120 myńnan astam bıznes sýbektisi jumys isteıdi. Bul ótken jylǵydan 20 paıyzǵa kóp. Qazirgi ýaqytta qala bıýdjetine túsetin salyqtyń jartysynan kóbin shaǵyn jáne orta bıznes berip otyr.
«Kásipkerlerdi qoldaý úshin memlekettik baǵdarlamalardyń quraldary belsendi qoldanylady. Bıznestiń jol kartasy arqyly 1090 kásipkerlik sýbektisi 185,9 mlrd teńge qoldaýǵa ık boldy. 873,3 mln teńge shaǵyn nesıe berildi. Kásipkerlikti endi bastaǵan 65 adam jeke isin uıymdastyrýǵa múmkindik aldy. Osy sharalardyń barlyǵy 9 myńnan astam jumys ornyn saqtap, taǵy da 6300-den astam jańa jumys ornyn ashýǵa múmkindik berdi», - dedi qala ákimi.
