Astanada kásipkerlerdiń «aq tizimi» bolady
"Astanada zańdy kóp buzatyn kompanııalar bar. Salyq tólemeıdi, tártipti buzady jáne taǵysyn taǵy. Al adal kásipkerlerdiń "aq tizimi" bolsa, jańaǵy zańdy buzatyndar oǵan kire almaıtynyn jáne bizben jumys isteı almaıtynyn túsine bastaıdy. Ákimdik ondaı tizimdi jasasa, áńgime kóp bolady. Sondyqtan "aq tizimdi" bıznestiń ózi jasap bersin. Ondaı tizim bizge aýadaı qajet. Áıtpese, deni durys seriktesterdi izdeımiz dep dal bolamyz", - deıdi Isekeshev.
Ákimniń aıtýynsha, qurylys salasynda keıbir kompanııalar kúl-qoqysty kóringen jerge qotara salady. Júk mashınalary sazdy kóshege shashyp júredi. Al, eń bastysy, qurylys jumystarynyń sapasy áli kúnge deıin syn kótermeıdi. Budan bólek, balabaqshalar, meıramxanalar, lıft qyzmeti jáne taǵy basqa salalarǵa qatysty aryz-shaǵymdar kóp. Osy oraıda Áset Órentaıuly árbir salaǵa naqty bir adamdy, ıa bolmasa, uıymdy belgilep, oǵan baqylaý quziretin berý kerek dep sanaıdy. Olar adal kásipkerlerdiń "aq tizimin" de jasap bere alady.
Aıta keteıik , búgin elorda ákimi Áset Isekeshev astanalyq kásipkerlermen kezdesti. Kezdesýge "Atameken" UKP prezıdıýmynyń tóraǵasy Tımýr Qulybaev ta qatysty. Sol jerde qala ákimi bızneske beriletin salalardy jarııalady.
Al Tımýr Qulybaev alǵashqy jobalarǵa adal kásipkerlerdi alyp kelýge ýáde berdi.