Astanada kásipkerler men memlekettik aýdıttiń laýazymdy tulǵasy sottaldy

ASTANA. QazAqparat - Astana qalasy «Baıqońyr» aýdanynyń №2 sotynda «Evraskon» AAQ (Ázerbaıjan Respýblıkasy) kompanııasynyń ókilderi Z. Ismıevke, G. Gadırovqa jáne «Aımereke» JShS dırektory A. Baıkenjege qatysty isti qaraý aıaqtaldy, dep habarlaıdy QazAqparat QR Sybaılas jemqorlyqqa qarsy is-qımyl agenttiginiń baspasóz qyzmetine silteme jasap.

Olar memlekettik satyp alý konkýrstarynyń qorytyndylaryn qaıta qaraǵany úshin Astana qalasy boıynsha Іshki memlekettik aýdıt departamentiniń laýazymdy tulǵalaryna para berdi dep kúdiktendi.

Osy jylǵy 27 naýryzdaǵy sot úkimimen atalǵan adamdar para berýge oqtalǵany úshin kináli dep tanyldy. Olarǵa 6 jylǵa bas bostandyǵynan aıyrý jazasy taǵaıyndaldy.

Sonymen qatar, para berýge ıtermelegeni úshin B. Kereıtbaev pen G. Shókenov kináli dep tanylyp, 7 jyl merzimge bas bostandyǵynan aıyryldy.

Sondaı-aq, adamdar tobynda birneshe ret alaıaqtyq jasaǵany úshin Astana qalasy boıynsha ІMAD mamany D. Tóleýbaev kináli dep tanylyp, 3 jylǵa bas bostandyǵynan aıyrý jazasy taǵaıyndaldy.

Atalǵan adamdardyń barlyǵy da memlekettik mekemelerde qyzmet atqarý quqyǵynan aıyrylǵan.

Sot tergeý áreketterin júrgizýge belsendi kedergi keltirgen D.K. Tóleýbaevtyń týysy – A.A. Ákimbaevty (teris sebeptermen jumystan shyǵarylǵan burynǵy jedel polıtsııa qyzmetkeri) kináli dep tanydy. Ol bılik ókilderine qatysty zorlyq-zombylyq jasap, jemqorlyq qylmystaryn jasaýda aıyptalýshylardy aıyptaıtyn zattaı dáleldemelerdi jasyrǵan. Sot onyń bostandyǵyn 2 jyl 6 aıǵa shektedi.

Sot úkimi zańdy kúshine engen joq.