Astanada kásip ashqysy keletinderge jańa múmkindikter beriledi
ASTANA. QazAqparat - Astanada jappaı kásipkerlikti damytýǵa baǵyttalǵan jańa baǵdarlama qabyldanatyn bolady. Bul týraly qalalyq ákimdikte Astana aktıviniń otyrysynda belgili boldy, dep habarlaıdy QazAqparat.
Ákimdiktiń baspasóz qyzmetiniń málimetine qaraǵanda, otyrys barysynda Memleket basshysynyń bes áleýmettik bastamasyn iske asyrý tetikteri talqylandy. Astana ákimi Áset Isekeshev aldaǵy bir aıdyń kóleminde qalada ózin-ózi jumyspen qamtyǵandar men jumyssyz azamattar arasynda jappaı kásipkerlikti damytýǵa baǵyttalǵan jańa baǵdarlamanyń ázirlenetinin jarııalady.
«Prezıdenttiń tórtinshi áleýmettik bastamasy ózin-ózi jumyspen qamtyǵandarǵa, jumyssyz júrgen azamattarǵa nesıe tetikteri arqyly óz isin bastaýǵa zor múmkindik beredi. Máselen, byltyrdyń ózinde biz shaǵyn bıznes ókilderine berilgen nesıeniń mólsheri 703,1 mlrd teńgeni quraıdy. Bul jaman kórsetkish emes. Degenmen, bul kórsetkishte toqtap qalmaımyz. Sol sebepti osy baǵyttaǵy jumysty barynsha belsendi etýimiz qajet. Ózimizdi jańa deńgeıge shyǵarǵanymyz abzal. Jańa baǵdarlama qabyldanǵan soń, onyń talaptaryn azamattarǵa túsindirý jumystaryna den qoıylýy kerek. «Damý» kásipkerlikti damytý qorynyń alańynda kezdesýler ótkizetin bolamyz», - dedi Áset Isekeshev.
Negizi, Astana qalasy shaǵyn jáne orta bıznes sýbektiler sanynyń ósý qarqyny jaǵynan elimizde kósh bastap tur.
Ulttyq banktiń málimetteri boıynsha 1 aqpandaǵy jaǵdaıǵa sáıkes, Astana qalasynyń ekonomıkasyna jalpy somasy 2 273,9 mlrd teńgeni quraıtyn nesıeler berilgen.
Foto: my.finanscompass.ru
