Astanada «Qasıettim - Jeltoqsan!» atty kitap jaryqqa shyqty
ASTANA. 24 jeltoqsan. QazAqparat - Astanada Bolatbek Tólepbergenniń «Qasıettim - Jeltoqsan!» atty kitabynyń tusaýkeser rásimi ótti.
QR Prezıdenti syılyǵynyń laýreaty, QR Mádenıet qaıratkeri, Memlekettik «Daryn» jastar syılyǵy men Qazaqstan Jastar Odaǵy syılyǵynyń ıegeri, fılosofııa ǵylymdarynyń kandıdaty Bolatbek Tólepbergen «Qasıettim - Jeltoqsan!» pýblıtsıstıkalyq kitabynda 1986 jylǵy Almaty qalasyndaǵy Jeltoqsan kóterilisiniń shyǵý sebep-saldary men oqıǵanyń órbý barysyn qamtýdy kózdegen. Sonymen qatar, kóteriliske qatysqan jáne odan keıingi kezde azamattyq ustanymyn kórsetken zııalylarymyzdyń, jastarymyzdyń qaısarlyǵy týraly syr shertiledi. Avtor Jeltoqsan kóterilisine qatysty tolyqqandy maǵlumatty naqty derektermen dáıekteıdi, jeltoqsandyq zııaly qaýym bolmysyn ashýǵa umtyla otyryp, Jeltoqsan kóterilisiniń bizge beımálim qyrlaryn baıandaýdy maqsat tutqan.
«Munda 1986 jylǵy jeltoqsan kóterilisi qalaı bastaldy, sharyqtaý shegi, aıaqtalýy qalaı boldy, odan keıingi kezeńderdegi onyń jaǵdaıy qalaı boldy degen turǵydaǵy suraqtarǵa jaýap berýge tyrystym. Kitapta Jeltoqsan oqıǵasyna qatysty Konstıtýtsııalyq sottyń 12 tomdyq materıaldary men muraǵattar qujattary paıdalanyldy. Sonymen qatar sol kezdegi jastardyń alańǵa bettep bara jatqan sýretteri osy kitaptiń qundylyǵyn arttyra tústi», - deıdi avtor.
Onyń aıtýynsha, kitaptiń taǵy bir ereksheligi Jeltoqsan oqıǵasynan keıin sottalyp, dattalǵan 800-den astam jastardyń tizimderi men olar týraly derekter usynylǵan. Mundaı materıaldar buryn-sońdy eshbir kitapta jaryq kórmegen.
