Astanada Qasıetti Qurban aıtta 28 tonna et taratyldy
ASTANA. QazAqparat - Astanada Qasıetti Qurban aıtta 28 tonna qurbandyq eti taratyldy. Bul týraly Qazaqstan musylmandary dinı basqarmasynyń baspasóz qyzmetinen habarlandy.
«Bıyl Astana ákimdigi qurbandyq shalý úshin arnaıy 8 nysan bekitti. Osy oryndarda segiz meshittiń qyzmetkerleri men medrese ustazdary, shákirtteri jáne "Zeket" qory ókilderi qyzmet etti. Atalmysh oryndarda qurbandyq shalý rásiminiń sharıǵat talabyna saı ótýi jiti qadaǵalanyp, qurbandyq etteri qabyldandy. Qasıetti Qurban aıtta «Rabbyń úshin qurban shal» qaıyrymdylyq sharasy aıasynda 3582 otbasyna jáne 40-qa jýyq qorlar men mekemelerge 28 tonna qurbandyq eti taratyldy»,-dep atap ótilgen baspasóz qyzmeti málimetinde.
Bas múftı Erjan qajy Malǵajyuly aıtýly merekede birqatar ıgi sharalarǵa qatysty. «Áziret Sultan» meshitinde elorda jurtshylyǵymen birge aıt namazyna qatysqan bas múftı osy kúni qaladaǵy jetim balalar úıinde «Aıaly alaqan» sharasyna qatysty. Beıkúná sábılerge syılyqtar taratylyp, bata-tilek jasaldy.
QMDB naıb múftıi, Astana qalasynyń bas ımamy Naýryzbaı qajy Taǵanuly aıtýly merekeniń qurmetine uıymdastyrylǵan ıgi sharalarǵa buqaramen birge qatysyp, jurtshylyqty aıt meıramymen quttyqtady. Naıb múftı ulyq merekeni ulttyq naqyshta atap ótý maqsatynda ótkizilgen sporttyq saıystarǵa da qatysyp, jamaǵatty atalmysh alamanda belsendi bolýǵa shaqyrdy (arqan tartý, qol kúrestirý, asyq atý, toǵyz qumalaq, kir tasyn kóterý t.b.). Saıysta top jaryp, oza shapqan azamattar meshittiń arnaıy syı-sııapatyna ıe boldy. Qurban aıt meıramynda balǵyn balalar men jetkinshek jastar da nazardan tys qalmady. 200 balaǵa aıttyq-syılyq taratylyp, úlken qalanyń kishkentaı turǵyndary merekeniń mol qýanyshyn sezindi.
Sonymen qatar, qala ákimdiginiń qoldaýymen «Nur Astana», «Áziret Sultan», «S.Ǵylmanı» meshitteriniń aýlasyna kıiz úıler qurylyp, baýyrsaq, qymyz syndy merekelik dám usynyldy.
«Nur Astana» ortalyq meshitinde qaladaǵy qarttar úıiniń 50 turǵynyna arnaıy dastarqan jaıylyp, «Astana fılarmonııasy» ánshileriniń qatysýymen ótken kontsert kópshilikke merekelik kóńil-kúı syılady.
«Sonymen qatar, Astana qalasyndaǵy qarttar úıinde «Qarttarym - asyl qazynam» atty kezdesý uıymdastyrylyp, qarııalarǵa merekelik dastarqan jaıyldy. Meshit ımamdary Astana qalasyndaǵy 166/22 jáne 166/10 eńbekpen túzeý mekemelerindegi jazasyn óteýshilermen kezdesip, aıttyq dastarqan jasalyp, qurbandyq etteri taratyldy. Mereke kúnderi din qyzmetkerleri №1 qalalyq aýrýhanadaǵy emdelýshilerge de arnaıy baryp, aıttyq syı-sııapat jasady», - delingen habarlamada.
Al Qurban aıt merekesiniń dástúrli ıgi sharasyna aınalǵan «Rabbyń úshin qurban shal» qaıyrymdylyq aktsııasy barysynda 104 iri qara mal qurbandyqqa shalyndy.
