Astanada «Qasıetti qazaq eli» halyqaralyq óner festıvali ótedi
NUR-SULTAN. QazAqparat - 6 shildede Qazaqstannyń astanasy kúni merekesi aıasynda «Qasıetti qazaq eli» halyqaralyq óner festıvali ótedi. Dúnıejúzi Qazaqtary qaýymdastyǵy, Nur-Sultan qalasy ákimdigi jáne QR Aqparat jáne qoǵamdyq damý mınıstrliginiń qoldaýymen ótetin shara elordadaǵy Jetisý saıabaǵynda «Open air» formatynda uıymdastyrylmaq, dep habarlaıdy QazAqparat.
Atalǵan halyqaralyq is-sharaǵa negizinen shetelde turatyn qandastarymyz qatysady. «Qasıetti qazaq eli» atalatyn óner festıvali qazaq mádenıetiniń rýhanı jáne materıaldyq biregeıligine súıene otyryp, daryndy jastardy anyqtaýǵa, olardy Qazaqstanǵa tartý arqyly odan ári qoldaýǵa baǵyttalǵan. Festıval folklorlyq ónerdiń biregeı janrlaryn, mýzykalyq jáne qoldanbaly ónerdiń biregeı úlgilerin saqtaýǵa, sondaı-aq shetelde turatyn otandastardyń shyǵarmashylyq jáne bilim berý áleýetin arttyrý maqsatynda ótkiziledi.
Festıvalda 4 nomınatsııa boıynsha baıqaý uıymdastyrylady. Atap aıtqanda, múshaıra nomınatsııasynda aqynnyń konkýrsqa usynǵan týyndysy buryn jarııalanbaǵan bolýy tıis. Týyndynyń kólemine shekteý qoıylmaıdy. Úmitkerler «Qazaq Eli», «Nur-Sultan», «Halyq murasy» taqyryptaryna arnalǵan 3 týyndysymen qatysýy tıis. Al terme nomınatsııasynda qatysýshy 2 týyndy oryndaıdy. Sonymen qatar, halyqtyq-qoldanbaly óner nomınatsııasynda avtorlyq buıymdy usyný, buıymdardy daıyndaý boıynsha sheberlik synyptaryn ótkizý qarastyrylǵan. Buıymdar qazaq halqynyń mádenıetin, dástúrin jáne turmysyn beıneleýi tıis. Budan bólek, ulttyq ánder nomınatsııasy da bar.
«Open air» formatynda ótetin festıvalda jeńimpazdar men qatysýshylar marapattalady. Onyń sońy qazaq estrada juldyzdarynyń qatysýymen ótetin Gala-kontsertke ulasady. Festıvaldyń basty nazary, «Sharyn» shatqalynyń ásem kórinisi janynda ornalasqan úlken sahnada festıval qatysýshylarynyń oryndaýynda eń úzdik mýzykalyq kompozıtsııalar oryndalady. Saıabaq aýmaǵynda 10 kıiz úıden turatyn etnoaýyl, kelýshilerdiń qolóner sheberleriniń jumys jasaý barysymen tanysa alatyn, ulttyq qolóner sabaqtaryna qatysa alatyn, etno-ónimderdi satýǵa arnalǵan kórme-jármeńke shyǵys bazary oryn alady jáne sýretke túsý aımaǵy da uıymdastyrylǵan.
