Astanada qasaqana kisi óltirdi degen kúdikpen kolledj stýdentteri ustaldy – ІІD
ASTANA. 16 qyrkúıek. QazAqparat - /Jasulan Amanbaıuly/ - Astanada saltanatty toı is-sharalarynda «Mersedes» kóligimen qyzmet kórsetýmen aınalysqan 22 jastaǵy júrgizýshini óltirdi degen kúdikpen Astana kolledjderiniń stýdentteri ustaldy.
Bul týraly búgin baspasóz máslıhatynda Astana qalalyq ІІD Tergeý basqarmasy bastyǵynyń orynbasary Bolatbek Ámirjanov málim etti.
Onyń aıtýynsha, 17-19 jastaǵy tórt stýdent osyndaı qandy qylmysqa kólikti bólshektep, keıin satý maqsatynda barǵan. Qylmyskerler saltanatty toı is-sharalaryna qyzmet kórsetýshi jas jigitti gazet betindegi habarlandyrý arqyly taýyp alǵan. Oǵan telefon shalyp, kezdesý belgileıdi. Keıin ony qalanyń shetine aldap aparyp, sol jerde pyshaqtap óltirip, kóligin aıdap áketken. Aldyn-ala jospar boıynsha, qylmyskerler kólikti «Drýjba» qoǵamynda ornalasqan garajdardyń arasyna tyǵyp ketedi. Biraq atalǵan garajdar qoǵamynyń kúzetshisi qyraǵylyq tanytyp, memlekettik nomer belgilerinsiz «Mersedes» avtokóligi turǵandyǵy jóninde polıtsııaǵa habarlaıdy.
«Jedel tergeý tobymen kólikti tekserý kezinde ishinen qan izderi tabylyp, tergeý amaldary júrgiziledi. Dál sol kúni saǵat 14.40 shamasynda Dýlatov kóshesinde ornalasqan orman alqabynan kóptegen jaraqattarmen avtokólik ıesiniń jansyz denesi tabylady. Dereý arada jedel top qurylady. 3 apta boıy júrgizilgen jedel-izdestirý amaldarynyń nátıjesinde Astana qalasy ІІD-niń qyzmetkerlerimen Astana qalasynyń 17-19 jastaǵy tórt stýdenti anyqtalyp, qylmys jasady degen kúdikpen tergeýge alynady», - deıdi B. Ámirjanov.
Onyń aıtýynsha, qazirgi ýaqytta ustalǵan kúdiktiler jasaǵan qylmystaryn tolyq moıyndady. Qaıtys bolǵan jigittiń úıinde onyń zaıyby men 5 aılyq balasy qaldy.
