Astanada qarttardy aldaǵan alaıaq ustaldy
ASTANA. QazAqparat - Astanada polıtsııa qyzmetkerleri balalary shetelde turyp jatqan egde jastaǵy turǵyndardy aldap júrgen alaıaqty qolǵa túsirdi, dep habarlady qalalyq polıtsııa departamentiniń baspasóz qyzmetinen.
Polıtsııa qyzmetkerleriniń málimetinshe, ustalǵan Qaraǵandy oblysynyń turǵyny ózine qolaı kórgen adamdardy aldyn ala anyqtaǵan. Elordanyń tynysh aýdandarynda turatyn azamattardyń senimine kirip, balalary shetelde ekenin, meken jaılaryn bilip alǵan.
Osylaısha, er adam 73 jastaǵy keıýananyń esigin qaǵyp, Eýropada turyp jatqan balasynan merekelik sálem-saýqat pen aqsha ákelgenin aıtqan. Ony estigen qart áıel beıtanys adamǵa esigin ashady. Ákelgen zattary kóliktiń ishinde ekenin aıtqan alaıaq 100 dollar aqshadan 43 myń teńge qaıtarylýy tıis ekenin jetkizgen. Aldanǵanyn sezbegen qart suraǵan aqshasyn beredi.
Polıtsııa qyzmetkerleri kúdiktini anyqtap, qolǵa túsirdi. Ol ýaqytsha ustaý oqshaýlaǵyshyna qamaldy. Alaıaqtyq faktisi boıynsha tergeý amaldary júrgizilýde.
Elordanyń polıtsııa departamenti turǵyndarǵa qyraǵy bolýdy, beıtanys adamdarǵa senbeýdi eskertedi. Alaıaqtardyń qurbandary kóbine egde jastaǵy adamdar. Olardyń qylmystyq áreketterinen zardap shekkender budan da kóp bolýy múmkin. Sondyqtan Astana polıtsııasy osyndaı jaǵdaıǵa túsken azamattardy tómendegi telefon nómirleri boıynsha habarlasýyn suraıdy: 8(7172) 71-67-90, 8-776-158-29-58 nemese 102.
