Astanada Qarttar kúnine oraı 21 myńnan astam zeınetkerge materıaldyq kómek kórsetiledi
ASTANA. 17 qyrkúıek. QazAqparat - Elordada Qarttar kúnine oraı 70 jasqa kelgen jáne odan asqan 21 myńnan astam qarııaǵa 3 myń teńge kóleminde bir rettik materıaldyq kómek kórsetiledi. Bul týraly astana.kz saıtyna qalalyq Jumyspen qamtý jáne áleýmettik baǵdarlamalar basqarmasynan habarlady.
Qazirgi ýaqytta elordada 57 myńnan astam zeınetker turady, sonyń ishinde 277-i Uly Otan soǵysyna qatysqandar men múgedekter, 4 483 tyl eńbekkerleri. Birneshe jyldan beri jekelegen áleýmettik toptarǵa jatatyn azamattar men zeınetkerler qalalyq jolaýshylar kóliginiń barlyq túrinde tegin júredi, sondaı-aq, aqysyz negizde tis protezdeý qyzmetterin paıdalanady.
Astanada Qarttar kúnin atap ótý aıasynda ardagerlerge qurmet kórsetý dástúri qalyptasyp, olardyń qajettilikterine basa nazar aýdarylady. Qalalyq basqarmalarmen zeınetkerlerge, qalalyq jáne aýdandyq ardagerler keńesterine arnalǵan birqatar merekelik is-sharalar men túrli qaıyrymdylyq aktsııalar uıymdastyrylady. Elordada turyp jatqan qarııalarǵa qamqorlyq kórsetý jergilikti atqarýshy organdardyń basymdy mindeti bolyp tabylady.
Budan basqa, qalalyq bıýdjetten «Jergilikti ókiletti organdar sheshimi boıynsha muqtaj azamattardyń jeke sanatyna áleýmettik kómek taǵaıyndaý» baǵdarlamasy boıynsha tólemder men kómek kórsetýdiń 15-den astam túri júzege asyrylady. Eske salaıyq, Halyqaralyq Qarttar kúni barsha álemde jyl saıyn 1 qazanda atap ótiledi.
