Astanada kartınamen bezendirilgen úı paıda boldy
ASTANA. QazAqparat - Astana úıleriniń biriniń syrtqy qabyrǵasy Qasteev atyndaǵy mýzeıden jınalǵan qazaqstandyq klassıkterdiń týyndylarymen tolyqty. Bul jóninde Saryarqa aýdanynyń ákimi Arman Turlybek málim etti, dep habarlaıdy QazAqparat tilshisi.
«Mine, Urban Art Astana halyqaralyq kóshe sýret óneri festıvali de óz máresine jetti. 15 maýsymda bastalǵan festıval qalamyzǵa otandyq jáne sheteldik sýretshilerdiń 8 jumysyn syılady. Astanalyqtar buǵan deıin de kóptegen úılerdiń syrtyndaǵy graffıtı ónerimen tanys bolsa, endi Á.Mámbetov kóshesi, 5-úıdiń Arbatqa jalǵasqan jeri men Kenesary kóshesinen Abaı dańǵylyna deıin oryn alǵan tutastaı óner týyndylary qala turǵyndary men qonaqtary úshin jaǵymdy jańalyq boldy. Qalalyq Arbattyń aýmaǵy odan ári keńeıýde. Biz kúni keshe ǵana osy úıdi sándep bitip, sońǵy boıaýyn syrladyq», - dep jazdy Astana qalasy Saryarqa aýdanynyń ákimi Arman Turlybek Facebook paraqshasynda.
Á. Qasteev atyndaǵy óner mýzeıinen jınalǵan qazaqstandyq óner klassıkteriniń týyndylarymen bezendirilgen úı ashyq aspan astyndaǵy galereıa ispettes.
«Bul jerde Tursyn Ábýov, Ábilhan Qasteev, Gúlfaırýs Ysmaıylova, Shaımardan Sarıev, Ǵanı Baıanov, Marııa Lızogýb jáne Aısha Ǵalymbaeva syndy tanymal avtorlardyń jumystaryn tamashalaı alasyzdar. Onyń ataýy kóp uzamaı «Tanymal kartınaly úı» dep atalyp ketetinine senimdimin. Buryn bul aýdan tek keńse ǵımarattary ornalasqan tynysh jer bolsa, endi qala turǵyndary men qonaqtary jıi serýendeıtin qyzyqty orynǵa aınalary sózsiz», - dedi ákim.
Aıta keteıik, Astana qalasy Saryarqa aýdanynyń ákimdigi jáne «Eýrazııalyq Mádenı Alıans» QB Elordanyń 20 jyldyǵyna arnap 16-30 maýsym aralyǵynda «Urban Art Astana» sýret óneriniń alǵashqy festıvalin ótkizdi. Festıval barysynda Qazaqstan sýretshileriniń qolynan shyqqan jáne basqa da elderdiń strıt-art ókilderi moıyndaǵan sýret óneri kórsetildi. Astanaǵa zamanaýı kóshe mádenıetin engizý boıynsha ótken jylǵy nátıjeli tájirıbeniń jalǵasy retinde bıyl jazda sýretshiler Saryarqa aýdanynyń qasbetterin ásemdedi.
Halyqaralyq komıssııa men jetekshiler 70-ten asa ótinimniń ishinen 26 nusqany iriktep alyp, halyqtyń daýys berýi arqyly 7 sýret bekitilgen bolatyn.
