Astanada Qarshyǵa Ahmedıarovtiń 75 jyldyq mereıtoıyna arnalǵan kontsert ótti

NUR-SULTAN. QazAqparat - «Astana Opera» sahnasynda Qazaq KSR Halyq ártisi, Qazaq KSR Memlekettik syılyǵynyń laýreaty, kúıshi, sheber dombyrashy, kompozıtor, dırıjer ári ustaz Qarshyǵa Ahmedıarovti eske alýǵa arnalǵan «Kúmbirle, asyl dombyra» kontserti ótti, dep habarlaıdy QazAqparat.

Teatrdyń baspasóz qyzmetinen málim etkendeı, sheber dombyrashynyń 75 jyldyq mereıtoıyna uzaq ýaqyt ázirlik jumystary júrgizildi. Sondyqtan kontsert baǵdarlamasy mándi, mazmundy bolyp, birde-bir kórermendi beı-jaı qaldyrmady. Zalǵa keremet maestronyń kóptegen áriptesteri, shákirtteri, onyń shyǵarmashylyǵyn qadir tutatyn jandar, týystary men jaqyndary jınaldy.

Kontsert Qarshyǵa Ahmedıarovtyń ómiri men shyǵarmashylyǵyna arnalǵan beınefılmmen bastaldy.

Osy keshte Ǵalym Ahmedıarov, Aıtqalı Jaıymov, Dına Hamzına, Azamat Jyltyrkózov, Rýslan Baımýrzın, Aıtjan Toqtaǵan, Jumabek Qadyrqulov, Batyrlan Ábenov, Edil Basyǵaraev, Dosym Maqsutov, Daryn Qudaıbergenov jáne taǵy basqa ónerpazdar kompozıtordyń mol murasyn tyńdarman nazaryna usyndy.

Tanymal qazaqstandyq mýzykanttarmen qatar kontsertke Memlekettik akademııalyq fılarmonııasy qazaq orkestriniń qyryqqa jýyq ártisi qatysty. Qazaq halyq kompozıtorlarynyń kóptegen shyǵarmalaryn óńdeý jáne óz paıymynsha túrlendirýden bólek, Q.Ahmedıarov óziniń tól týyndylary – «Shashaqty naıza shalqar kún», «Naryn», «Qýanysh», «Saǵynysh», «Aqqaıyń», «Jeldirme» jáne taǵy basqa kúılerin, sondaı-aq ánderin muraǵa qaldyrdy.