Astanada qarshadaı qyzdy zorlamaq bolǵan pedofıl 15 jylǵa sottaldy
ASTANA. QazAqparat - Astana soty kóktemde eldi shýlatqan pedofılge úkim kesti. Qyzdy qamys ishine súıregen soqtaldaı azamatty sol mańdaǵy qurylysshylar baıqap, ońdyrmaı sabaǵan bolatyn, dep habarlaıdy KTK .
Ramaı Hafızov mamyrda Astananyń jańa temir jol vokzalynyń mańynda alty jasar qyzdy aldap úıinen alyp shyǵyp, zorlamaq bolǵan. Aram oıyn iske asyra almaı kózge túsip qalǵan soń, kóldi júzip ótip, qashqan qylmyskerdi jaqyn jerden tabylǵan qurylysshylar tyrp etkizbeı baılap, polıtseılerdiń qolyna tapsyrǵan-dy.
«Hafızov Ramaı Raısuly kináli dep tanylyp, Qylmystyq kodekstiń 24 babynyń úshinshi tarmaǵy boıynsha 15 jylǵa bas bostandyǵynan aıyrylsyn. Sondaı-aq ómir boıyna pedagogıkalyq jáne kámeletke tolmaǵan balalarmen baılanysty kez-kelgen qyzmetpen aınalysýyna tyıym salynsyn»,- dedi sýdıa Ádilhan Shaıhıslamov.
Bir aptanyń ishinde núktesi qoıylǵan úkim alqa bılerdiń aralasýymen shyqty. Al 48 jastaǵy pedofıl Aqmola oblysynyń týmasy, Astanaǵa traktorıst bop jumys isteýge kelgeni belgili. Úılenbegen. Ol óziniń qurbanyn jaqsy tanıdy eken. Qylmysqa barmas buryn, búldirshinniń áke-sheshesimen araq ishken. Onyń ústine qyzdyń ata-anasy tanystarynyń jaqynda túrmeden shyqqanyn da bilipti. Uzaq merzim arqalap, temir torǵa qaıtqan azamatty memleket májbúrli túrde jaman ádeti, maskúnemdikten de emdeıdi. Úkimdi túsindim dep ıshara bildirgen pedofıl, ózin kináli sezinip turǵan joq.
- Sot barysynda Hafızov kinásin moıyndaǵan joq. Sondyqtan sottan aqtap alýdy suradyq. Búgin de úkimmen kelispeı, shaǵym beremin dedi. Men advokat retinde onyń nıetin oryndaımyn, -deıdi onyń qorǵaýshysy Sabına Shapenova.
Úkimnen soń oń kún kútip, apellıatsııalyq shaǵym jazamyn degen advokattyń ózi de jazanyń ózgere qoıaryna senbeıdi. Al Hafızovtyń merzimi qamalǵan kúni, 10 mamyrdan eseptelmek.
Al pedofıldi ustap, taıaqqa jyqqan qurylysshylar áý basta jazalanýy múmkin delingen edi. Alaıda búgin sýdıa qarashadaı qyzdy aman alyp qalǵan 4 azamatty marapattaý týraly Astana qalasy men Almaty oblysynyń ákimderine ótinish joldady. Óıtkeni, jigitter osy aımaqtyń turǵyndary eken. Al marapattaý aqshalaı ne basqalaı bolaryn ákimdik pen jumys berýshi sheshýi tıis.
