Astanada «Qarlyǵash uıa salǵanda» teleserıalynyń tusaýkeser rásimi ótti
ASTANA. QazAqparat - Búgin «Habar» agenttiginiń tapsyrysymen túsirilgen «Qarlyǵash uıa salǵanda» teleserıalynyń tusaýkeser rásimi ótti, dep habarlaıdy QazAqparat tilshisi.
Jańa týyndyny kórermender «Habar» arnasynan 29 qazannan bastap dúısenbi-beısenbi kúnderi saǵat 19:15-te tamashalaı alady. Romantıka men dramaǵa negizdelgen fılm 12 serıaldan turady.
«Qarlyǵash uıa salǵanda» teleserııalynyń mazmunyna kelsek, basty keıipker Qarlyǵash (Kámshat Joldybaeva) jasy 32-de, jumysynda tabysty. Jalǵyz ózi úlken úıde ómir súredi, salaýatty ómir saltyn ustanyp durys tamaqtanady, eń qymbat dúkenderden kıinedi, alaıdy jeke ómiri sátsiz. Birde ol kórshi úıde zerger symbatty jigittiń ómir súretinin baıqaıdy. Al Tasqyn (Erkebulan Daıyrov) áıelinen erte aırylyp, qyzdaryn jalǵyz ósirip jatqan jalǵyz basty áke. Tasqyn jumys barysynda jaraqat alyp, onyń jedel járdem alyp ketedi. Kórshileri Qarlyǵashqa balalarǵa qaraı turýdy suraıdy, basynda bas tartqanymen keıin kelisedi. Osydan keıin onyń ómiri ózgere bastaıdy.
«Teleserıaldaǵy negizgi másele búgingi bizdiń qoǵamda bar kári qyz problemasy. ıAǵnı fıllmde qyzdardyń qyzmet qýyp nemese barlyq jaǵdaıdy jasap alaıyn turmysqa sosyn shyǵa jatarmyn degen oılary kórinis tabady. Serıaldyń ishinde romantıka, drama, komedııa bári bar. Meniń prodıýser retinde kórsetkim kelgeni qyzdar óz jaǵdaıymdy jasap alaıyn jigit sosyn tabylady demeı, ýaqyt sozbaı turmys quryp, shańyraqty shattyqqa bóleýdi jıirek oılasa degen oı. Ekinshi aıtpaǵym kınoda kórsetilgendeı turmysqa shyǵý mindet, áıteýir shyqsam boldy degen oıdan aýlaq bolý kerek. Óıtkeni, ómirdiń óz jospary bar, ár adamnyń óziniń juby men ómirlik baqyty bar. Bir sózben aıtqanda búgingi qoǵamda bolyp jatqan dúnıeni kıno qylyp túsirdik»,- dedi teleserıaldyń bas prodıýseri Gúlnur Mamasarıpova.
Sondaı-aq, teleserıaldyń tusaýkeserine kartınada basty róldi somdaǵan Kámshat Joldybaeva men Erkebulan Daıyrov, fılmniń túsirilim toby jáne BAQ ókilderi qatysty. 
«Meniń keıipkerimniń ózime uqsas birneshe tustary bar, atap aıtqanda jas erekshiligi, ómirdegi ustanymy men alǵa qoıǵan maqsaty jáne minezi. Fılmniń negizgi ıdeıasy búgingi qoǵamdy kórsetý, ıaǵnı qoǵamda ómir súrip jatqan adamdardyń ómiri arqyly, adamnyń baqyty - ol otbasy men onyń jaqyn jandary ekenin meńzedik. Kınoǵa túsý barysynda sonshalyqty qıyndyqtar bolǵan joq, oǵan sebep keıipkerimniń ózime uqsastyǵy. Jáne taǵy bir aıtarym osy serıal arqyly qazir turmys qurmaı júrgen kári qyzdar ózderin kóre alady dep aıta alar edim»- dedi teleserıaldaǵy Qarlyǵashtyń rólin somdaýshy, belgili ánshi Kámshat Joldybaeva. 
Kámshat Joldybaeva buǵan deıin «Habar» agentigi túsirgen «Traktorshynyń mahabbaty», «Ógeı júrek» teleserıaldarynda, al Erkebulan Daıyrov Sevastopol qalasynda halyqaralyq laýreat atanǵan «Baýyrjan Momyshuly» fılminde basty róldi somdaǵan.
Aıta ketsek, búgin «Habar» telearnasy týǵan kúnin atap ótýde, 1995 jyly qurylǵan elimizdiń basty arnasyna 23 jyl tolyp otyr.
Osyǵan deıin 15 qazannan bastap kúnde saǵat 22.20-da «Habar» telearnasynda álemdik kınolardyń kórsetilimi bastalatyndyǵyn jazǵan bolatynbyz.
