Astanada káriz qudyqtarynyń urlanǵan qaqpaqtaryn izdep-tabý úshin metall qabyldaý beketteri tekserilýde - ákim
ASTANA. 29 mamyr. QazAqparat - Astanada metall qabyldaý beketteri tekserilýde.
Bul týraly óziniń jeke blogynda turǵyndardyń saýalyna jaýap bergen qala ákimi Imanǵalı Tasmaǵambetov málim etti.
«Sálemetsiz be! Men saıtqa «Nuraı» balabaqshasynyń mańyndaǵy ashyq qudyqtar týraly birneshe márte jazǵan bolatynmyn. Kommýnaldyq qyzmetter shara qoldandy, degenmen, birneshe aı ótisimen olar qaıta ashyq kúıinde jatyr», - dep jazǵan qala turǵyny ákimge.
«Qazirgi ýaqytta biz barlyq lıýktardy qalpyna keltirdik. Olardyń bútindigin saqtaý úshin kommýnaldyq qyzmetter men Astanalyq ІІD-niń patrýldik qyzmeti tarapynan jiti qadaǵalaý qajet. Onymen qosa, men quzyretti qurylymdarǵa kommýnaldyq qudyqtardyń urlanǵan qaqpaqtary ótkiziletin metalldardy qabyldaý beketterine shuǵyl is-sharalar ótkizýdi tapsyrdym. Osyǵan uqsas jaǵdaılardyń tájirıbesi kórsetkendeı, bul anaǵurlym tıimdi nátıjeler beredi, - dep jaýap berdi hatqa I.Tasmaǵambetov.
Anyqtalǵandaı, bul ákimniń atyna atalmysh máselemen kelip túsken jalǵyz hat emes. Promyshlennyı kentiniń turǵyny mektep janyndaǵy ashyq qudyqqa alańdaýshylyq bildirgen.
Qala basshysy óziniń jaýabynda káriz qudyǵynyń ashyq jatqandyǵyn rastady jáne Almaty aýdanynyń ákimi Sapar Ahmetovke eldi mekendegi jaǵdaıdy baqylaýǵa alýdy jáne azamattardyń shaǵymdaryna jiti nazar aýdarýdy tapsyrǵanyn atap ótti.
