Astanada Káripbek Kúıikovtiń kórmesi ashyldy
ASTANA. QazAqparat - 2017 jylǵy 9 tamyz kúni Qazaqstan Respýblıkasy Ulttyq mýzeıinde qazaqstandyq sýretshi, antııadrolyq qozǵalystyń belsendisi Káripbek Kúıikovtiń «Radıatsııa» atty kórmesi ashyldy, dep habarlaıdy QR Ulttyq mýzeıiniń baspasóz qyzmeti.
Kórmeni Qazaqstan Respýblıkasy Syrtqy ister mınıstriligi Ulttyq mýzeımen birlesip uıymdastyrǵan.
Qaraǵandylyq sýretshi Káripbek Kúıikov Qazaqstandaǵy antııadrolyq ustanymyn nasıhattap, búkil álemge erekshe talantymen tanylǵan tulǵa. Ol Qaraǵandy oblysyndaǵy Semeı ıadrolyq polıgonynan zardap shekken Egindibulaq aýylynda dúnıege keldi. Sol sebepti qoly joq bop týǵan. Onyń sýret salýy da ózgeshe. Óz týyndylaryn qylqalamdy tisimen tistep, keıde aıaǵynyń bashpaılary arqyly beıneleıdi.
«Ǵajaıyp talant ıesiniń taǵdyrly týyndylary osymen úshinshi márte Ulttyq mýzeı tórine qoıylyp otyr. Bul shyǵarmalar árbir qazaq azamatyn izgi oıǵa jeteleıdi degen úmittemiz. Ómirin ónerge aınaldyrǵan Káripbek Kúıikov sekildi kúresker tulǵanyń týyndylary júrek tebirentpeı qoımasy anyq Tipti, barsha adamzatty beıbit ómirge, dostyq-tatýlyqqa shaqyrary sózsiz. Men óz atymnan, barsha mýzeı qonaqtary atynan sýretshige alǵys aıtqym keledi», - dedi kórmeniń ashylý saltanatynda QR Ulttyq mýzeıi dırektorynyń mindetin atqarýshy Jáken Taımaǵambetov.
Káripbek Kúıikov Amerıka, Japonııa, Germanııanyń jeke jáne memlekettik kollektsııalaryna qoıylǵan. Onyń kórmeleri Japonııada, AQSh, Germanııa, Túrkııa, Qytaı jáne Qazaqstanda uıymdastyryldy. Káripbektiń kórkem týyndylarynyń basty taqyryby ıadrolyq qarýdyń adamzatqa keltirer qaterimen baılanysty.
«Búgingi kórme ıadrolyq qarýdyń qasireti men odan bas tartý jáne ıadrolyq qarýsyz beıbit ómir ornatý jolyndaǵy jetistikterge arnaldy. Avtordyń týyndylary shet memleketterge de tanystyrylǵan. K. Kúıikovtyń shyǵarmalaryn halyq jyly qabyldap, sýretshiniń eńbekteri arqyly atom bombasynyń zardabyn túsingen. Tipti, nelikten ıadrolyq qarýdan eń birinshi bolyp Qazaqstannyń bas tartqanyn uǵyndy. Qazirgi qoǵam zardaby búgingi kúnge deıin jalǵasyp kele jatqan sol qasiretti bilý, túsiný úshin K. Kúıikovtyń týyndylaryn qaıta-qaıta tamashalasa da, artyq bolmaıdy», - dedi óz sózinde QR Syrtqy ister vıtse-mınıstri Roman Vasılenko.
Qazaqtan Prezıdenti Nursultan Nazarbaev 2016 jyly ıadrolyq qaýipsizdik jónindegi halyqaralyq samıtte AQSh Prezıdenti Barak Obamamen kezdesken kezinde oǵan K. Kúıikovtyń «Jarylys» degen kartınasyn syıǵa tartqan bolatyn.
Kórmeniń ashylý saltanatyna elimizdiń tanymal saıasat jáne qoǵam qaıratkerleri, Qazaqstan Respýblıkasy Syrtqy ister mınıstriliginiń, halyqaralyq «Nevada-Semeı» qoǵamdyq qozǵalysynyń ókilderi qatysty.
