Astanada qardyń az jaýýy bıýdjet qarjysyn únemdeýge kómektesti — ákim

ASTANA. KAZINFORM — Astana ákimi Jeńis Qasymbek qardyń az jaýýyna baılanysty qar tazalaý jumystaryna jumsalatyn qarajattyń únemdelgenin aıtty.

Ortalyq kommýnıkatsııalar qyzmetindegi brıfıngte tilshiler qardyń az jaýýyna baılanysty qar shyǵarý jumystarynda únem boldy ma degen suraq qoıdy.

— Árıne, qarsyz ótken árbir kún belgili bir deńgeıde únem jasaýǵa kómektesedi. Bul jaýyn-shashyn kólemine qaraı kúnine 50-100 mln teńgeni, keıde odan da kóp somany quraýy múmkin. Biraq bizde buryn da dál osyndaı emes, alaıda soǵan uqsas qystar bolǵanyn túsinemiz: qar keıinirek kóp jaýǵan kezder de bolǵan. Eki jyl buryn kúz jańbyrly bolyp, qar kesh jaýdy, alaıda qańtar-aqpan aılary qarly boldy. Sondyqtan biz ázirge kútip otyrmyz, qar báribir kerek, ásirese dıqandar egin egetin kórshiles oblystarǵa kerek. Meniń oıymsha, qys áli óz degenin jasaıdy, — dep jaýap berdi Astana ákimi.

Sonymen birge, elorda ákimi qazir Astanadan shyǵarylyp jatqan qar kólemi ótken qyspen salystyrǵanda 2-3 ese az ekenin aıtty.

Buǵan deıin Jeńis Qasymbek elordada ekinshi áýejaı salynýy múmkin degen qaýeset jóninde pikir bildirdi.

Oǵan qosa, ákim Kishi Taldykóldegi ekopark qurylysynyń ne sebepti bıyl bastalmaǵanyn túsindirgen edi.