Astanada karatedan Álem chempıonaty ótedi
ASTANA. QazAqparat - Astanada Qazaqstannyń jaýyngerlik óner qaýymdastyǵynyń I kongresi bastaldy, dep habarlaıdy QazAqparat tilshisi.
Aıta ketken jón, atalǵan uıym ótken jyly qurylǵan bolatyn. Onyń quramyna olımpıadalyq emes sport túrleri boıynsha 20 federatsııa kiredi. Qaýymdastyq tórt baǵytta jumys isteıdi. Sonyń ishinde karate, kúres, tolyq kontaktyly sport túrleri jáne MMA aralas jekpe-jekteri bar. Uıymdy QR UQK tóraǵasy Kárim Másimov basqarady. Aımaqtyq fılıaldar 14 oblysta, Astana, Almaty men Shymkent qalalarynda ashylǵan.
«Qaýymdastyq jaýyngerlik ónerdiń qundylyqtaryn nasıhattap, sporttyń damýyna, sport salasyndaǵy mamandardy daıarlaýǵa yqpal etetin bolady. Atalǵan uıym Qazaqstandaǵy jaýyngerlik ónerdiń basty organyna aınalady. Búginde elimizdiń barlyq aımaqtarynda fılıaldar ashylyp otyr», - dedi K.Másimov búgingi kongreste.
Onyń aıtýynsha, olımpıadalyq emes sport túrlerin biriktirýdiń arqasynda birqatar naqty sharalar da atqaryldy. «Qaýymdastyqty qurǵannan keıin bizge KWU atalymy boıynsha karate kıokýshınkaıdan Álem chempıonatyn ótkizýge usynys tústi. Atalǵan shara aǵymdaǵy jyly jeltoqsan aıynda ótedi degen jospar bar»,- dep atap kórsetti ol.
Kongreske QR Aqparat jáne qoǵamdyq damý mınıstri Dáýren Abaev, QR Mádenıet jáne sport mınıstri Arystanbek Muhamedıuly, QR Qorǵanys mınıstri Nurlan Ermekbaev, sondaı-aq shetelden kelgen qonaqtar qatysýda. Shara barysynda mınıstrlikter ekijaqty kelisimderdi rásimdeıdi. Al sektsııalyq otyrystarda sport salasynyń ózekti máseleleri talqylanady.
