01:15, 27 Tamyz 2024 | GMT +6
Astanada Qaraótkel kópirine baratyn jol úsh kúnge jabylady
ASTANA. KAZINFORM — Astana ákimdigi jóndeý jumysyna baılanysty taǵy bir jol jabylatynyn eskertti.
Astana qalasynyń kólik jáne jol-kólik ınfraqurylymyn damytý basqarmasy Qalqaman kóshesinen Qaraótkel kópirine deıingi joldyń ústińgi qabatyn salý jumysy júrgiziletinin habarlaıdy.
Osyǵan baılanysty 26-29 tamyz aralyǵynda joǵaryda atalǵan ýchaske ishinara jabylatyn bolady.
Bul rette avtokólik qozǵalysy taraptardyń biri boıynsha eki baǵytta da júzege asa beredi.
«Elorda turǵyndary men qonaqtarynan qala joldarynda keptelis bolmas úshin óz marshrýtyn aldyn ala josparlaýdy suraımyz. Ýaqytsha qolaısyzdyq úshin keshirim suraımyz jáne jol-qurylys jumysyn júrgizýge túsinistikpen qaraýdy ótinemiz» dep eskertedi ákimdikten.
