Astanada karaokeden qalalyq chempıonat ótedi
ASTANA. QazAqparat - Elordada karaokeden Astana ákimi kýbogi úshin qalalyq chempıonat ótedi, dep habarlaıdy QazAqparat.
Bul týraly «Jastar saraıy» kesheniniń Facebook-tegi resmı paraqshasynda habarlandy.
Taratylǵan málimetter boıynsha, baıqaýdyń irikteý kezeńi 19 mamyrda bastalmaq.
«19 mamyrda saǵat 17:00-de «Jastar Saraıynda» «Barlyǵy án salady!» atty karaokeden Astana ákimi kýbogi úshin qalalyq chempıonat ótedi. Astana ákiminiń qoldaýymen «Jastar Saraıy» uıymdastyryp otyrǵan mýzykalyq jobaǵa 18 jastan bastap, barlyq talantty azamattar qatysa alady. Úmitkerlerdiń mýzykalyq bilimi bar ma, joq pa mańyzdy emes, ózderiniń súıikti ánderiniń birin oryndap, baıqaýǵa qatysýǵa jol ashyq», - delingen habarlamada.
Kastıngtan ótken daryndy oryndaýshylar vokal mamanynan sabaq alyp, estrada juldyzdarymen sheberlik synyptarynan ótedi. Astana ákiminiń kýbogin jeńip alý úshin úmitkerler taǵy eki kezeńnen ótýleri tıis. Eń kóp upaı jınaǵan qatysýshylar aqtyq synǵa joldama alady.
«Jastar Saraıy» ókilderiniń aıtýynsha, qatysýshylar úsh topqa bólinedi. Birinshi jáne ekinshi irikteý kezeńderi 10 jáne 24 maýsymda ótedi. Al jartylaı fınal men aqtyq syn 5-6 shildede bolady. Úsh toptyń jeńimpazdary «Karaoke chempıony-2017» ataǵyn jáne aqshalaı syıaqy alady. Eń joǵary upaı jınaǵan qatysýshy Astana ákiminiń kýbogin ıelenedi.
Eń alǵashqy «Barlyǵy án salady!» atty baıqaý 2015 jyly ótken bolatyn.
