Astanada karantın tártibin elemegen 6 nysan 3 aıǵa deıin jabylýy múmkin
NUR-SULTAN. QazAqparat – Nur-Sultan qalasynyń bas sanıtarlyq dárigeri Janna Pralıeva elordada monıtorıng toptary qalaı jumys istep jatqanyn baıan etti, dep habarlaıdy QazAqparat tilshisi.
«Osy jyldyń 10 qarasha men 10 jeltoqsan aralyǵynda monıtorıng toptary shekteý jáne karantın sharalarynyń buzylýyna qatysty 158 shuǵyl habarlama jiberdi: Osylaısha Úılestirý ortalyǵynan shuǵyl habarlamalar kelip tústi. Jospardan tys tekserý nátıjeleri boıynsha jalpy somasy 28 933 070 teńge bolatyn 107 ákimshilik aıyppul salyndy (onyń ishinde bir nysandaǵy 4 qyzmetkerge aıyppul salynǵan). Kemshilikterdi retteý jóninde 105 nusqama berildi», - deıdi Janna Pralıeva.
Shekteý jáne karantın sharalarynyń «ádeıi buzǵandarǵa» qatysty nusqamany oryndamaǵany úshin Nur-sultan qalasynyń mamandandyrylǵan aýdanaralyq ákimshilik sotyna QR ÁQBtK-niń 462-babynyń 3-bóligi boıynsha 7 ákimshilik hattama jiberildi. Olar: «sova» karaoke barynyń, «Janym sol» karaoke-barynyń, «Alanya» túngi klýby, «Teqila» laýndj-bary, «Echo» bary, «Altyn» meıramhanasy.
«Ákimshilik kodekstiń 462-babynyń 3-bóliginiń sanktsııasy nysan qyzmetin toqtata otyryp, ákimshilik aıyppul túrindegi jaza berýdi kózdeıdi. Basqarma ókilderi ókilderi joǵaryda atalǵan nysandardyń qyzmetin 3 aıǵa deıin toqtata turý túrinde qosymsha jaza sharasyn qoldaný týraly sotqa ótinish jasaıdy», - dedi ol.
