Astanada karantın kezinde qyz uzatyp, týǵan kún toılaǵandar anyqtaldy

NUR-SULTAN. QazAqparat – Ákimdik, qalalyq orta sapasy jáne baqylaý basqarmasy ókilderi men polıtseılerden quralǵan mobıldi top ótken táýlikte 139 kásipkerlik mekemeni tekserdi, dep habarlaıdy QazAqparat Nur-Sultan polıtsııa departamentiniń baspasóz qyzmetine silteme jasap.

Tekserý barysynda karantın tártibin buzǵan 7 obekti anyqtaldy. Onyń ishinde dúkender, kafe-barlar men spa salon bar.

Sondaı-aq Turan kóshesinde «Qyz uzatý» jáne 50 jas mereıtoı toılanyp jatqan. Eki merekelik is-sharada da qonaqtar karantın erejesin jáne áleýmettik qashyqtyqty saqtamaǵan.

Mobıldik top teksergen kezde uzatý toıǵa qatysýshylardyń bári ortada bılep júrgen jáne qonaqqa kelgenderdiń ishinde jas balalar men qarııalarǵa deıin bolǵan.

Tártip buzýshylarǵa qatysty jınalǵan materıal QR ÁQBtK 425-babyna saı ákimshilik jaýapqa tartý úshin Nur-Sultan qalasynyń qalalyq orta sapasy jáne baqylaý basqarmasyna jiberildi.

Eske sala ketsek, 18 qańtardan bastap qoǵamdyq tamaqtaný oryndary (meıramhana, kafe-bar jáne basqalary) áleýmettik qashyqtyq pen sanıtarııa talaptaryn saqtaı otyryp 7.00-20.00 aralyǵynda jumys isteıdi.

Nur-Sultan qalasynyń polıtsııa departamenti mekeme ıeleri men kelýshilerdiń beıqamdyǵy vırýstyń taralýyna sebep bolyp, adamdardyń ómirine qaýip tóndiretinin eskertedi.