Astanada Qaraǵandy oblysy aýyl sharýashylyǵy ónimderiniń jármeńkesi ótip jatyr
ASTANA. QazAqparat - Astanadaǵy jármeńkege Qaraǵandy oblysynan 556 tonnadan astam aýyl sharýashylyǵy ónimderi jetkizildi, dep habarlaıdy QazAqparat tilshisi.
Elordadaǵy Qazaqstan sport kesheniniń aýmaǵynda eki kúnge sozylatyn jármeńke saýda alańynda 40 shatyr ornatyldy.
Qaraǵandy oblysynan 50-den astam sharýa qojalyǵy óz ónimderin jetkizdi, atap aıtqanda «Karaǵandy - NAN» JShS, «Nátıje sút fabrıkasy» JShS, «Evrazıan Fýds» AQ, «Bıdaı NAN» JShS, «Fırma Tulpar» JShS sııaqty iri óndirýshi kásiporyndar qatysýda.
«Búgin elorda halqyna óńirimizdiń aýyl sharýashylyǵy ónimderi jetkizildi. Bizdiń jármekeniń bir ereksheligi, taýardyń sapasy men baǵasy. Naqty aıtqanda Astana halqy naryqtaǵy baǵadan 15-20 %-ǵa tómen baǵamen alýda. Jármeńke barysynda baıqaǵanymyz, bizdiń et pen qymyzǵa suranys joǵary, kóptep alýda. Odan bólek kartop jáne sút ónimderin jaqsy qarqynmen alýda. Jalpy aıtqanda biz ákelgen ónimderdiń kóbisi Astana dúkenderinde kóptep tabylady. Sebebi, bizdiń oblystaǵy óndirýshiler Astana jaqyn bolǵandyqtan kóterme baǵamen jáne tikeleı jetkizedi. Degenmen búgingi jármeńkeniń orny bólek, másele baǵasynda», - dedi Qaraǵandy oblysynyń aýyl sharýashylyǵy basqarmasynyń basshysy Saǵynjan Apakashov.
Jármeńkede 556 tonnadan astam aýyl sharýashylyǵy taýaryn óndirýshilerdiń ónimderi usynyldy, onyń ishinde:
-et ónimderi - 98 tonna;
- sút ónimderi - 12 tonna;
- balyq ónimderi - 5 tonna;
- kartop - 350 tonna;
- kókónister - 75 tonna;
- basqa da ónimder - 16 tonna.
- jumyrtqa - 360 myń dana.
Aýyl sharýashylyǵy jármeńkesi aıasynda baýyrsaq jáne qymyz festıvali, sondaı-aq Qaraǵandy oblysynyń shyǵarmashylyq ujymdarynyń kontserttik baǵdarlamasy uıymdastyrylýda.
