Astanada Qaraǵandy oblysynyń kreatıvti jármeńkesinde 10 mln teńgeniń ónimi satyldy
ASTANA. KAZINFORM- 17-18 qazanda Astanadaǵy Qazaq Creative Hub alańynda ótken Qaraǵandy oblysynyń kreatıvti ındýstrııalar jármeńkesine 4 500 adam baryp, jalpy quny 10 mln teńgeniń ónimi satyldy. Іs-shara Kreatıvti ındýstrııalardy damytý qorynyń Creative Aimaq jobasy aıasynda uıymdastyryldy.
QR Mádenıet jáne aqparat mınıstrligi baspasóz qyzmetiniń habarlaýynsha, jármeńkege óńirdegi shyǵarmashylyq kásippen aınalysatyn 80-nen astam sýretshi, dızaıner, qolóner sheberi, kásipker jáne tehnologııalyq joba avtory qatysty.
Kópshilikke ulttyq jáne zamanaýı úlgidegi kıimder, avtorlyq áshekeıler, keramıka, kilemder, kıizden jasalǵan buıymdar, kartınalar jáne úıdi bezendirýge arnalǵan zattar usynyldy. Sonymen qatar Qaraǵandy oblysynyń óndiristik tarıhy men shyǵarmashylyq áleýetin tanytatyn kómirden jáne metaldan jasalǵan kórkem buıymdar kórsetildi.
Jármeńkeniń bir bóliginde ónerkásiptik 3D basyp shyǵarý, aqparattyq tehnologııalar, jasandy ıntellekt jáne ushqyshsyz qurylǵylar salasyndaǵy jobalar tanystyryldy. Atap aıtqanda, medıtsınaǵa arnalǵan anatomııalyq modelder men Qarmet kásiporyndarynda qoldanylatyn polımer bólshekterdi jasaý tehnologııalary kórsetildi.
Mádenı baǵdarlama aıasynda kontsertter, dızaınerlik kıim toptamalarynyń kórsetilimderi, kitap tanystyrylymdary men sheberlik sabaqtary ótti. Sondaı-aq belgili qazaqstandyq sýretshi Qaripbek Kúıikovtiń «Qaısar rýh» jáne «Jızn bez rýk» kitaptary tanystyryldy.
Jármeńke otandyq ónimderdi kópshilikke tanytýǵa, iskerlik baılanystardy keńeıtýge jáne shyǵarmashylyq kásip ıelerin qoldaýǵa múmkindik berdi. Mundaı bastamalar kreatıvti ındýstrııalardy damytýǵa, óńirlerdiń áleýetin arttyrýǵa jáne ekonomıkasyn nyǵaıtýǵa yqpal etedi.
Osyǵan deıin Astanada Almaty oblysynyń kreatıvti jármeńkesi ótip, oǵan myńdaǵan adam qatysqany týraly jazdyq.
