Astanada Qaraǵandy men ShQO-nyń aýyl sharýashylyǵy jármeńkesi ótti
ASTANA. KAZINFORM — Elordada óńirlik aýyl sharýashylyǵy jármeńkeleri maýsymyn Qaraǵandy jáne Shyǵys Qazaqstan oblystarynyń taýar óndirýshileri jalǵastyrdy. Ótken demalys kúnderi olar astanalyqtarǵa óz ónimderin usyndy, dep habarlaıdy Astana ákimdiginiń resmı saıty.
Jármeńke «Qazanat» ıppodromy aýmaǵynda ótti. Eki óńirdiń agrarııleri elordaǵa et, balyq, sút jáne bakaleıa ónimderin, jańa pisken kókónis pen jemis-jıdek, sondaı-aq bal jetkizdi. Barlyǵy 700 tonnadan astam taýar fermerlerden tikeleı jetkizildi.
«Jármeńkeniń maqsaty – elordanyń azyq-túlik qaýipsizdigin qamtamasyz etý. Barlyq fermer ónimderin «alqaptan dastarhanǵa deıin» qaǵıdaty boıynsha satady, sol sebepti baǵa qoljetimdi bolyp otyr. Ár óńir óz óndirýshilerin iriktep, eń úzdik taýarlaryn usynady», – dedi Astana qalasy Investıtsııalar jáne kásipkerlikti damytý basqarmasy basshysynyń orynbasary Maqsat Janabaev.
Saýdamen qatar, is-shara ulttyq naqyshta bezendirilip, kontserttik baǵdarlama uıymdastyryldy.
«Ár óńir óz ónimderimen tanymal. Kontserttik qoıylymdar men jetkizilgen taýarlar arqyly qatysýshylar óńirlerdiń dástúri men mádenı erekshelikterin pash etti», – dep qosty ol.
Jármeńkege qatysýshylardyń qatarynda dástúrli sýsyndar men fermerlik ónim óndirýshiler boldy.
«Biz qymyz óndiremiz, ol – ulttyq qundylyǵy zor sýsyn. Mundaı jármeńkeler bıznesti damytýǵa, básekelestikti arttyrýǵa jáne tájirıbe almasýǵa múmkindik beredi. Bizdiń qymyzymyz Astanada jáne Dýbaıda ótken EKSPO kórmelerinde de usynylǵan. Bul jerge de qatysqanyma qýanyp otyrmyn: halyq kóp, kóńil kúı keremet», – dedi Qazaq House brendiniń ókili Arsen Jánibek.
Kelýshiler jármeńkedearzan ári sapaly ónimder bar ekenin jáne otbasymen birge jaqsy ýaqyt ótkizýge múmkindik bergenin atap ótti.
«Demalys kúni jármeńkege bardym, ókingen joqpyn. Munda naǵyz qazaqy rýh seziledi: mýzyka, bezendirý, adamdardyń kóńil-kúıi erekshe. Eń bastysy – baǵalary jaqsy ári Qazaqstannyń túkpir-túkpirinen ákelingen ónimderdi kórýge bolady. Bul óte qyzyq boldy», – dedi elorda turǵyny Mádı.
Eske sala ketsek, bıyl jármeńkeler ár demalys saıyn «Qazanat» ıppodromynyń avtoturaǵynda (Qarqaraly tas joly, 1 mekenjaıynda) ótkizilip keledi.
Aıta keteıik, ótken aptada Astanadaǵy jármeńkege BQO men Qostanaı 500 tonnaǵa jýyq ónim ákelgen bolatyn.