Astanada «qara rıeltorlar» bar ma
ASTANA. QazAqparat - Astanada jalǵyz qalǵan egde jastaǵy adamdardyń baspanasyn «qara rıeltorlardyń» ıemdenip ketý oqıǵalary tirkelgen joq. Bul týraly «QazAqparat» HAA joldaǵan resmı saýalǵa bergen jaýabynda Astana qalasy Jumyspen qamtý, eńbek jáne áleýmettik qorǵaý basqarmasy basshysynyń orynbasary Sáýle Nurǵojına málim etti.
«Búgingi tańda jalǵyzbasty egde adamdardyń, jetim balalardyń qaıtys bolýyna nemese balalar úıine kóshýine baılanysty olardyń páterleriniń kommýnaldyq menshikke kóshý jaǵdaılary tirkelgen joq.
«Astana qalasynyń turǵyn úı basqarmasy» MM derekteri boıynsha UOS ardagerlerine, jasy jetken zeınetkerlerge, jetim balalarǵa berilgen teńgerimde turǵan páterlerdi «qara rıeltorlarmen» qaıta satý jaǵdaılary týraly málimetter tirkelgen joq», - dep atap ótti Nurǵojına.
Qazirgi ýaqytta Astana qalasy ákimdiginiń «Áleýmettik qyzmet kórsetý ortalyǵy» MKQK-y 320 jalǵyz basty qarttar pen múgedekterge qyzmet kórsetýde. Astana qalasy ákimdiginiń «Sharapat» áleýmettik qyzmet kórsetý ortalyǵynda 275 adam tolyq memlekettik asyraýǵa alynǵan.
Búginde elordada jalǵyzbasty qart adamdarǵa kútim kórsetetin áleýmettik qyzmetkerlerdiń sany - 41. Áleýmettik qyzmetkerlerdiń jalaqysy bilimi men jumys ótiline qaraı, 50 myńnan 65 myń teńgege deıin belgilengen. Áleýmettik paket jolaqy bıletin berýden jáne demalysqa saýyqtyrý járdemaqysyn tóleýden ǵana turady.
