Astanada qar shyǵaratyn «KAMAZ» kólikteri jetpeı jatyr
ASTANA. QazAqparat - 2016 jyldyń qazanynan beri Astananyń kommýnaldyq qyzmeti 2 mln 200 myń tekshe metr qar tazalaǵan. Qazir negizgi problemanyń biri - qardy qala syrtyna shyǵaratyn kólikter jetpeı jatyr eken. Bul týraly búgin keshke qala boıynsha reıd ótkizgen Astana ákiminiń orynbasary Qosman Aıtmuhambetov málim etti, dep habarlaıdy QazAqparat tilshisi.
«Búgin tańerteń 1249 tehnıka shyqty, keshten beri 1500 tehnıka qar tazalaýmen aınalysyp jatyr. Qazirgi másele - qardy qala syrtyna shyǵaratyn «KAMAZ» kólikteri jetpeı jatyr. «KAMAZ»-dar qardy qaladaǵy úsh aýdannyń árqaısysyna tıesili, qala syrtyndaǵy qar polıgondaryna aparady. «Kamazdy» qarǵa toltyrý úsh-aq mınýt, biraq, kóliktiń polgıonǵa baryp kelýi uzaq ýaqyt alady»,-deıdi ákim orynbasary Q.Aıtmuhambetov.
Bıyl qardyń erte ári kóp jaýǵanyna qaramastan, qazir qalanyń basty kóshelerin tazalap úlgerip jatyrmyz, deıdi ákimniń orynbasary.
«Qazan aıynan bastap 2 mln 200 myń tekshe metr qar shyǵardyq. Byltyr qysta 2 mln 900 myń tekshe metr qar shyǵarylǵan edi. 2014 jyly 3.2 mln tekshe metr, 2015 jyly 3.4 mln tekshe metr qar shyǵardyq. Alda áli úsh aı qys bar...»,-deıdi ákim orynbasary.
