Astanada qar qursaýynda qalǵan 3 balany qutqarǵan jigitter marapattaldy
NUR-SULTAN. QazAqparat - Nur-Sultan qalalyq tótenshe jaǵdaılar departamentiniń bastyǵy Qýanar Bazarbaev úsh balany qutqarǵan batyrlardy marapattady, dep habarlaıdy QazAqparat.
Búgin TJD bastyǵy Baýyrjan Muqyshev, Narıman Seken jáne Erjan Shekenovti úsh balany qutqarý kezinde kórsetken erligi, batyldyǵy men qaısarlyǵy úshin alǵys hatpen marapattady.
Bul oqıǵa bıylǵy qańtar aıynda bolǵan.
12 qańtar tústen keıin kámelet jasyna tolmaǵan úsh bala Sarybulaq kóshesimen úıine qaıtyp kele jatqan. Kóshe janynda osy attas ózen bar edi.
8 jasar ul bala qorshaýdan ótip, órmelep júrgende tepe-teńdikti saqtaı almaı ózenge qulaıdy. Ol belýardan keletin omby qarǵa túsip, odan shyǵa almaı qalady.
Іnisin qutqarmaq bolǵan 10 jáne 12 jasar eki qyz tómenge túsip, ony súırep alyp shyǵýǵa tyrysqan. Biraq ózderi de qalyń qardyń qursaýynda qalyp qoıady.
Balalar jarty saǵattan astam ýaqyt omby qardan shyǵa almaı, sol jerde turady. Denesi tońazyp, qoryqqan úsheýi bar daýsymen aıǵaılap, kómek suraǵan.
Sol mezette kópirdiń janynan ótip bara jatqan úsh jigit Baýyrjan Muqyshev, Seken Narıman jáne Erjan Shekenov oılanbastan balalarǵa der kezinde kómekke kelip, balalardy qardan alyp shyǵyp, qutqaryp qalǵan.
Olar sosyn balalardy kólikke otyrǵyzyp, úıine aparady. Kóz jasyna ıe bola almaǵan áke úsh jigitke alǵysyn aıtty.
Batyrlardyń biri Narıman Beısembaıuly «Qazaqstan sportshylar odaǵy» qoǵamdyq birlestiginde tóraǵanyń kómekshisi bolyp jumys isteıdi.
Qutqarylǵan balanyń ata-anasy onyń bokspen aınalysýdy armandaǵanyn aıtty.
«Qazaqstandyq sportshylar odaǵy» balanyń armanyn júzege asyrý úshin tolyq sport jıyntyǵyn satyp alyp, ony boks sektsııasyna jazdy.
