Astanada qar kúreýge júzdegen jol jumysshy men tehnıkalar jumyldyryldy

ASTANA. KAZINFORM – Qalanyń kommýnaldyq qyzmetteri aýysymdyq rejımde táýlik boıy kúsheıtilgen tártipte jumys istep jatyr. Qar tazalaý úzdiksiz júrgizilýde, dep habarlaıdy Astana ákimdiginiń resmı saıty.

7 qarashada túngi aýysymǵa qala kóshelerin qardan tazartýǵa 200-ge jýyq jol jumysshy men 300-den astam arnaıy tehnıka shyqty.

Eń aldymen, erejege sáıkes, joldarda keptelis bolmas úshin qozǵalysy qarqyndy tustar tazartylady. Sondaı-aq, qarqyndylyǵy ortasha ýchaskeler — alańdar, vokzal mańy aýmaqtary, trotýarlar, áleýmettik nysandarǵa kirme joldar jáne t. b. qardan tazartylady.

Qalada birneshe jabdyqtalǵan qar polıgony bar. Olar samosval tehnıkasynyń nómirlik belgilerin oqý júıesimen jabdyqtalǵan, munda beınebaqylaý kameralary ornatylyp, jaryqtandyrý qosylǵan.

«Qazgıdromet» RMK derekteri boıynsha, 8 qarashada Astanada kóshpeli bult, qar, boran bolady. Ońtústik-batystan soqqan jeldiń jyldamdyǵy — 9-14 m/s, ekpini — 15-20 m/s.

Elorda turǵyndary men qonaqtarynan joldarda abaı bolýdy, qaýipsizdik erejelerin saqtaýdy, daýyldy eskertý bolǵan jaǵdaıda alys saparlarǵa shyqpaýdy suraımyz.

Tótenshe jaǵdaı týyndaǵan kezde «112» telefonyna habarlasyńyz», — delingen ákimdiktiń dereginde.