Astanada qar kúreýge myńdaǵan jol jumysshysy shyqty
ASTANA. KAZINFORM – Elordada alǵash qar jaýǵan kúnnen bastap qalanyń kommýnaldyq qyzmeti kúsheıtilgen rejımde jumys istep keledi. Qazirgi ýaqytta qar kúreý jumysy táýlik boıy júrgizilip jatyr, dep habarlaıdy elorda ákimdiginiń resmı saıty.
Ótken túnde qar polıgondaryna 2 565 aýyr júk kóliginiń reısimen elordadan 42 418 tekshe metr qar men muz shyǵaryldy.
18 aqpan kúni tańerteńnen bastap qalany qar men muzdan tazartý jumysyna 1 610 arnaıy tehnıka men 3 076 jol jumysshysy jumyldyryldy. Eń aldymen negizgi kósheler men qoǵamdyq kólik júretin baǵyttar tazartylady. Odan keıin qozǵalys qarqyny ortasha aýmaqtarda – aýlalarda, alańdarda, trotýarlar men aıaldamalarda tazalaý jumysy júrgiziledi.
Jalpy, qys mezgili bastalǵaly beri qaladan qar polıgondaryna 363 201 reıspen 5 mln 346 myń 042 tekshe metr qar shyǵarylǵan. Qala turǵyndarynyń qaýipsiz qozǵalysyn qamtamasyz etý úshin joldar, trotýarlar men kóshelerge tehnıkalyq tuz sebilýde. Bul jumystar da táýlik boıy atqarylyp jatyr.
Astana qalasynyń ákimdigi qala turǵyndary men qonaqtaryn qaýipsizdik erejelerin saqtaýǵa, joldar men trotýarlarda barynsha saq bolýǵa, sondaı-aq qolaısyz aýa raıy jaǵdaıynda alys jolǵa shyqpaýǵa shaqyrady.
Buǵan deıin Astanada Túrki áleminiń balalar oıyndary halyqaralyq festıvali ótip jatqanyn habarlaǵan edik.