Astanada qar kúreýge 3000-ǵa jýyq jumysshy shyqty
ASTANA. KAZINFORM — Qys maýsymy bastalǵaly elordanyń kommýnaldyq qyzmetteri táýlik boıy kúsheıtilgen rejımde jumys istep keledi.
Ótken túni kommýnaldyq qyzmet ókilderi 701 reıspen 11 572 tekshe metr qardy qala syrtyna shyǵardy.
14 qarasha kúni kúndizgi aýysymda qar kúreý jumysyna shamamen 3 000 jol jumysshysy men 1 178 arnaıy tehnıka jumyldyryldy.
Kommýnaldyq qyzmet jumysynyń negizgi baǵyttarynyń biri – kóktaıǵaqtyń aldyn alý sharalary. Qala turǵyndarynyń qaýipsiz qozǵalysyn qamtamasyz etý úshin joldar men trotýarlarǵa tehnıkalyq tuz sebiledi.
Aıta keteıik, qys mezgili bastalǵaly elordanyń arnaıy polıgondaryna 268 myń tekshe metrge jýyq qar shyǵarylǵan. Bul 18 299 aýyr júk kóliginiń reısine teń.
Aldymen negizgi magıstraldar men qoǵamdyq kólik baǵyttary tazalanady. Odan keıin ortasha qozǵalysy bar aýmaqtar – aýlalar, alańdar, trotýarlar jáne aıaldamalar retke keltiriledi.
Astana ákimdigi qala turǵyndary men qonaqtaryn qaýipsizdik erejelerin saqtaýǵa, jolda jáne trotýarlarda barynsha muqııat bolýǵa, sondaı-aq aýa raıy qolaısyz kezde alys saparǵa shyqpaýǵa shaqyrady.
Aıta ketelik 14 qarashada elimizdiń basym bóliginde tuman túsip, kóktaıǵaq bolady.