Astanada qar kúreýge 3 myńnan astam jumysshy men 1 500-ge tarta arnaıy tehnıka tartyldy

ASTANA. KAZINFORM – Elordadaǵy kommýnaldyq qyzmetter kúsheıtilgen, úzdiksiz rejımde jumysyn jalǵastyrýda. Qar kúreý jumysy táýlik boıy júrgizilip jatyr, dep habarlaıdy Astana qalasy ákimdiginiń resmı saıty.

Aýa raıynyń qubylýyna baılanysty kúndiz qalada aýa temperatýrasy plıýstik deńgeıde saqtalyp, qar erıdi, al túnde kúrt sýytyp, joldar men jaıaý júrginshiler joldarynda kóktaıǵaq ornaıdy. Aıta keteıik, ótken túnde elordada jańbyr jaýǵan.

Qala turǵyndarynyń qaýipsiz júrýin qamtamasyz etý úshin joldarǵa, trotýarlar men kóshelerge tehnıkalyq tuz sebilýde.

- Ótken túnde kommýnaldyq qyzmetter qaladan 1 519 reıspen 21 myń tekshe metrden astam qar shyǵardy.

15 jeltoqsan kúni tańerteńgi jaǵdaı boıynsha qar kúreý jumysyna 3 myńnan astam jol jumysshysy men 1 500-ge tarta arnaıy tehnıka jumyldyryldy.

Qys mezgili bastalǵaly beri qala aýmaǵynan qar polıgondaryna 44 706 júk kóligimen 600 myń tekshe metrden astam qar shyǵaryldy, - dep jazdy Astana ákimdiginen.

Aldymen negizgi kósheler men qoǵamdyq kólik júretin baǵyttar tazalanady. Odan keıin qozǵalys qarqyny ortasha aýmaqtarda — aýlalarda, alańdarda, trotýarlar men aıaldamalarda jumystar júrgiziledi.

Sonymen qatar, aýla aýmaqtarynyń tazalyǵyna PIK pen MIB jaýapty ekenin atap ótken jón. Olar turǵyndardyń qaýipsizdigi men qolaılyǵy úshin qar men muzdy ýaqytyly tazalaýǵa mindetti.

Astana qalasynyń ákimdigi qala turǵyndary men qonaqtaryn qaýipsizdik erejelerin saqtaýǵa, joldar men trotýarlarda barynsha saq bolýǵa, qolaısyz aýa raıy jaǵdaıynda alys jolǵa shyqpaýǵa shaqyrady.

Aıta keteıik, Astanada «Taza sana – Taza qala» baıqaýynyń jeńimpazdary marapattaldy.