Astanada qar kúreý jumysyna eki myńnan astam jumysshy jumyldyryldy

ASTANA. QazAqparat - Elordada kommýnaldyq qyzmetter qalany qardan tazartý boıynsha táýlik boıy jumysyn jalǵastyrýda. 21 aqpan kúni tústen keıin qar kúreý jumysyna eki myńnan astam jol jumysshysy jumyldyryldy, dep habarlaıdy QazAqparat Astana ákimdigine silteme jasap.

21 aqpanǵa qaraǵan túni elordadan 16 myń tekshe metrden astam qar nemese 1244 reıs shyǵaryldy. Tańerteńnen bastap elordanyń kósheleri men joldaryn tazartýǵa eki myńnan astam jol jumysshysy men 1000-nan astam arnaıy tehnıka jumyldyryldy.

Qys mezgiliniń basynan beri qaladan 3,3 mıllıon tekshe metrden astam qar shyǵaryldy, ol úshin qar polıgondaryna 269 703 reıs jasaldy.

Esterińizge sala keteıik, «Qazgıdromettiń» boljamy boıynsha búgin de qar jaýady. 21 aqpanda elordada kóshpeli bult shyǵyp, túnde jáne tańerteń qar, boran bolady dep kútilýde. Joldarda kóktaıǵaq bolýy múmkin. Sonymen qatar, qalada ońtústik-batystan, ońtústikten sekýndyna 9-14 metr jel kútiledi.

Qala turǵyndary men qonaqtarynan saq bolýdy, kóktaıǵaq kezinde qozǵalys erejelerin saqtaýdy suraımyz. Kólik júrgizý kezinde jyldamdyq rejımi men qashyqtyqty qatań saqtaý qajet.

Foto: Astana ákimdiginiń baspasóz qyzmeti