Astanada qar kúreý jumystaryna myńdaǵan jumysshy men tehnıka jumyldyryldy
ASTANA. KAZINFORM – Astanada alǵashqy qar jaýǵannan bastap qalanyń kommýnaldyq qyzmetteri táýlik boıy toqtaýsyz jumys istep keledi, dep habarlaıdy qala ákimdiginiń resmı saıty.
Ótken túnde qala aýmaǵynan arnaıy polıgondarǵa 2 327 aýyr júk kóliginiń qatysýymen shamamen 36 735 tekshe metr qar shyǵaryldy.
16 qańtar kúni tańerteńnen bastap qar tazalaý jumystaryna 2 983 jol jumysshysy men 1 517 arnaıy tehnıka jumyldyryldy.
Qys maýsymy bastalǵaly beri jalpy kólemi 2 651 830 tekshe metrden astam qar 197 847 reıspen tasymaldandy.
Aldymen negizgi kósheler men qoǵamdyq kólik júretin baǵyttar tazalanyp jatyr. Keıin qozǵalys qarqyny ortasha aýmaqtarda – aýlalarda, alańdarda, trotýarlar men aıaldamalarda qar tazalaý jumystary júrgiziledi.
Qala turǵyndarynyń qaýipsiz qozǵalysyn qamtamasyz etý maqsatynda joldar, trotýarlar men kóshelerge tehnıkalyq tuz sebilýde. Bul jumystar da táýlik boıy júzege asyrylýda.
Sonymen qatar aýla ishindegi tazalyq páter ıeleri kooperatıvteri men múlik ıeleri birlestikteriniń jaýapkershiliginde. Olar turǵyndardyń qaýipsizdigi men jaılylyǵy úshin aýlalardy qar men kóktaıǵaqtan ýaqytyly tazalaýǵa mindetti.
Astana qalasynyń ákimdigi turǵyndar men qonaqtardy qaýipsizdik erejelerin saqtaýǵa, joldar men trotýarlarda abaı bolýǵa, sondaı-aq qolaısyz aýa raıy kezinde uzaq saparǵa shyqpaýǵa keńes beredi.
Eske salsaq, buǵan deıin Almaty turǵyndaryna kóktaıǵaq pen tumanǵa baılanysty eskertý jasalǵanyn habarlaǵanbyz.
