Astanada qar kúreý jumysyna myńǵa jýyq arnaıy tehnıka jumyldyryldy
ASTANA. KAZINFORM — Astanada qalyń qar jaýyp jatyr. Aýa raıynyń qolaısyzdyǵyna qaramastan, qalanyń kommýnaldyq qyzmeti táýlik boıy úzdiksiz jumys isteýde, dep habarlaıdy elorda ákimdiginiń resmı saıty.
31 jeltoqsan kúni qala aýmaǵynan qar polıgondaryna 1 016 júk kóligi arqyly 13 myń tekshe metrden astam qar shyǵaryldy.
1 qańtarǵa qaraǵan túni kóshe-jol jelisin tazalaý jumysyna 269 jol jumysshysy men myńǵa jýyq arnaıy tehnıka jumyldyryldy. Jumystar negizgi magıstraldarda, kvartalishilik joldarda, trotýarlar men jaıaý júrginshiler aımaqtarynda júrip jatyr.
Qys maýsymy bastalǵaly beri qar polıgondaryna jalpy kólemi 1 390 944 tekshe metr qar shyǵaryldy. Bul 106 497 júk kóligi reısine teń.
Qala turǵyndarynyń qaýipsiz qozǵalysyn qamtamasyz etý maqsatynda joldarǵa, trotýarlar men jaıaý júrginshiler aımaqtaryna kóktaıǵaqqa qarsy materıaldar sebilip jatyr.
Qys mezgili bastalǵaly beri shamamen 4 000 tonna tehnıkalyq tuz qoldanyldy. Qalany tazalaý jáne óńdeý jumysy táýlik boıy júrip jatyr.
Astana ákimdigi qala turǵyndary men qonaqtaryn joldar men trotýarlarda saq bolýǵa, qaýipsizdik sharalaryn saqtaýǵa jáne saparǵa shyǵar aldyn aýa raıyn eskerýge shaqyrady.
Aıta keteıik, Astanada Esil jaǵalaýyndaǵy muz aıdyny ýaqytsha jabyldy.