Astanada qar kúreý jáne trotýarlarǵa tuz sebý jumysyna 1 400-den astam tehnıka shyqty
ASTANA. KAZINFORM – Elordanyń kommýnaldyq qyzmeti táýlik boıy kúsheıtilgen ári toqtaýsyz rejımde jumysyn jalǵastyrýda, dep habarlaıdy qala ákimdiginiń resmı saıty.
Ótken túnde Astanadan 1 475 reıspen 18 myń tekshe metrden astam qar shyǵaryldy.
17 jeltoqsan kúni tańerteńgi jaǵdaı boıynsha qar kúreý jumysyna 3 myńnan astam jol jumysshysy men 1 400-den astam arnaıy tehnıka jumyldyrylǵan.
Qys mezgili bastalǵaly beri qala aýmaǵynan qar polıgondaryna jalpy kólemi 688 myń tekshe metrden astam qar 53 541 júk kóligimen shyǵaryldy.
Aldymen negizgi kóshe magıstraldary men qoǵamdyq kólik baǵyttary tazalanady. Odan keıin qozǵalys qarqyny ortasha aýmaqtarda – aýlalarda, alańdarda, trotýarlar men aıaldamalarda jumy júrgiziledi.
Qala turǵyndarynyń qaýipsiz qozǵalysyn qamtamasyz etý maqsatynda joldarǵa, trotýarlar men kóshelerge tehnıkalyq tuz sebilip jatyr.
Sonymen qatar, aýla aýmaqtaryndaǵy tazalyqty qamtamasyz etý PIK pen MIB-tiń mindeti ekeni eske salynady. Olar turǵyndardyń qaýipsizdigi men qolaılylyǵy úshin aýlalardy qar men muzdan ýaqytyly tazalaýy tıis.
Astana qalasynyń ákimdigi turǵyndar men qala qonaqtaryn qaýipsizdik erejelerin saqtaýǵa, joldar men trotýarlarda barynsha saq bolýǵa, sondaı-aq qolaısyz aýa raıy kezinde alys jolǵa shyqpaýǵa shaqyrady.
Aıta keteıik, búgin Astanada men 17 óńirde kún raıy nasharlaıdy.
