Astanada qaptaǵan qońyzdarǵa qatysty ákimdik túsinikteme berdi
ASTANA. KAZINFORM - Astana turǵyndary áleýmettik jelilerde turǵyn úı keshenderiniń mańynda qaptap ketken jándikterge shaǵymdandy. Qalalyq Qorshaǵan ortany qorǵaý jáne tabıǵatty paıdalaný basqarmasy olardyń qara qońyzdar ekenin aıtty.
Threads qoldanýshysy Máńgilik El jáne Buqar jyraý dańǵylynyń boıyndaǵy úılerdiń mańynan kórgen qońyzdardyń sýretterin jarııalaǵan. Pikir jazǵan turǵyndardyń aıtýynsha, bul jándikter balkondarda da paıda bolǵan. Keıbir qoldanýshylar osyndaı qońyzdardy Aqtóbe, Qostanaı jáne Ekibastuz qalalarynda da kórgenin jazǵan.
Basqarma ókilderiniń túsindirýinshe, qara qońyz adam densaýlyǵyna qaýip tóndirmeıdi jáne josparly dezınsektsııa júrgiziletin zııankester qataryna jatpaıdy.
– Bul jándikterdiń jappaı paıda bolýy – maýsymdyq tabıǵı qubylys. Bul olardyń tabıǵı kóshý kezeńimen baılanysty. Mamandardyń baqylaýyna sáıkes, arnaıy óńdeý jumystaryn júrgizbeı-aq olardyń sany bir jarym-eki apta ishinde ózdiginen azaıady, – delingen habarlamada.
Mamandardyń aıtýynsha, qara qońyzdar shaqpaıdy ári jıhazǵa zııan keltirmeıdi. Degenmen keıbir túrleri qaýip tóngen jaǵdaıda qorǵaný úshin jaǵymsyz ıisti suıyqtyq shashýy múmkin.
Buǵan deıin Mańǵystaý oblysynda qara qońyz qaptap ketip, oǵan zertteý júrgizilip, karantındik jándik emes ekendigi anyqtalǵan bolatyn.
