Astanada qant jetispeýshiligi joq - ákimdik
ASTANA. QazAqparat - Baǵany turaqtandyrý úshin Astana ákimdigi turaqty negizde azyq-túlik taýarlarynyń baǵasyna monıtorıng júrgizip turady, dep habarlaıdy elorda ákimdiginiń resmı saıty.
Eń qajetti degen taǵam túrleri erekshe baqylaýda tur, onyń ishinde qant ta bar. Búginde elordada defıtsıt pen qant baǵasynyń artyp ketkendigi baıqalmaıdy. Barlyq saýda obektileri men jetkizýshiler shtattyq rejimde jumys istep jatyr. Baǵany turaqtandyrý maqsatynda jáne qanttyń jetkiliksiz bolmaýyna jol bermes úshin turaqtandyrý qory quryldy, qorǵa 1500 tonna qant satyp alyndy jáne basqa da áleýmettik mańyzy bar azyq-túrleri alyndy. Kórsetilgen qant kólemi (1500 tonna) jetispeýshiliktiń aldyn alýǵa jáne deldal uıymdardyń alypsatarlyq áreketine áserin tıgize alady.
Qazirgi tańda qorda 945 tonna qant bar, qalanyń iri saýda jelilerinde 1 kelisi 240 teńgeden satylýda. Odan basqa, «Shapaǵat» kommýnaldyq bazarynyń 36 saýda núktesinde qant satylady. Sonymen birge statıstıka departamentiniń resmı málimeti boıynsha Astanada bir aptanyń ishinde qant baǵasynda ózgeris baıqalmaǵan. Azyq-túlik baǵasy baqylaýda tur.
