Astanada qansha kólik bar
ASTANA. QazAqparat – Kún saıyn Astanaǵa jaqyn eldi mekenderden 55 myńǵa deıin avtomobıl kiredi. Bul týraly elordadaǵy Polıtsııa departamenti jergilikti polıtsııa qyzmeti basqarmasynyń bastyǵy Arman Aıtmaǵambetov aıtty, dep habarlaıdy QazAqparat tilshisi.
«Qaladaǵy joldardaǵy kólik qozǵalysyna birqatar faktor áser etip jatyr. Kún saıyn Astanaǵa jaqyn eldi mekenderden 55 myńǵa deıin avtomobıl kiredi. Sonymen qatar qala boıynsha taıaý shet elderden kelgen 20 myńǵa jýyq avtokóliktiń qozǵalysy tirkeldi. Jalpy, qalada tirkelgen kólikterdiń sany 76 myńǵa artqan, Atap aıtqanda, 2018 jyly 344 146 kólik tirkeýde tursa, qazir 420 143-ke deıin jetti», - dedi A.Aıtmaǵambetov Astana qalasynyń kommýnıkatsııalar qyzmetindegi baspasóz máslıhatynda.
Onyń aıtýynsha, júrgizýshiler men jaıaý júrginshilerdiń jol erejesi talaptaryn oryndamaýy qaıǵyly jaǵdaıǵa ákelip jatady. Árbir tórtinshi jol-kólik oqıǵasy, ıaǵnı 23,4 paıyzy jaıaý júrginshilerdiń kinásinen bolady.
Aıta keteıik, qyrkúıekte bir aı boıy polıtsııa qyzmetkerleri «Abaılańyz-balalar!» jedel-profılaktıkalyq is-sharasyn ótkizedi.
Budan buryn habarlanǵandaı, 2023 jyldyń basynan polıtsııa qyzmetkerleri elordada joldaǵy qozǵalys boıynsha ereje buzýdyń 100 myńnan astam deregin anyqtady. Kólikti mas kúıinde basqarǵan 855 júrgizýshi ustaldy, al apattyq jaǵdaı jasaǵany úshin 1 500-den astam ákimshilik hattama toltyryldy.
