Astanada qańǵybas ıtter men mysyqtardyń qyrylyp jatqany ras pa

Áleýmettik jelide Astanada qańǵybas ıtter men mysyqtardyń ólip jatqany týraly aqparat tarady. Jazba avtorynyń aıtýynsha, ýaqytsha ustaý mekemesinde jaǵdaı múldem nashar, saldarynan ıtter men mysyqtar qyrylyp jatyr. Іstiń mán-jaıyn anyqtaý úshin Kazinform agenttigi elordanyń qalalyq orta sapasy jáne baqylaý basqarmasyna resmı saýal joldady.

«Jyl basynan beri 8446 qańǵybas janýar ustaldy. Ustalǵan ıtter men mysyqtar ıesine qaıtarylǵansha nemese basqa adamǵa asyraýǵa berilgenshe ýaqytsha ustaý pýnktinde 60 kún ustalady. 60 kúnnen keıin ıtter men mysyqtar «Stop Otlov» eriktiler uıymyna beriledi. Sondaı-aq, 60 kún ishinde olarǵa qurttarǵa qarsy degelmıntızatsııa, qutyrýǵa qarsy vaktsınatsııa jáne chıpteý sııaqty veterınarııalyq-profılaktıkalyq sharalar júrgiziledi», - delingen resmı jaýapta.

Basqarmanyń aqparatyna sáıkes, qazir ýaqytsha ustaý pýnktinde 3000 ıt jáne 236 mysyq bar.

Jyl basynan beri 3089 ıt pen 590 mysyq arnaıy jabdyqtalǵan ınsınerator peshinde joıyldy. 

«Ýaqytsha ustaý pýnktinde qańǵybas ıtter men mysyqtardyń kútip, baptaýmen 10-15 adam aınalysady («Stop Otlov» 5-10 erikti jáne kásiporynnyń 8 qyzmetshisi). Olardyń mindetine kúndelikti tazalaý, ıtter men mysyqtardy sýarý jáne tamaqtandyrý kiredi. Astana qalasy máslıhatynyń 2022 jylǵy 30 qyrkúıektegi № 238/32-VII «Astana qalasynda ıtter men mysyqtardy aýlaý, ýaqytsha ustaý jáne jansyzdandyrý qaǵıdalaryn» sheshiminiń 29-babynyń 4-taraýyna sáıkes, qańǵybas ıtter men mysyqtardy ýlaýǵa, hımııalyq preparattardy paıdalanýǵa jáne kez kelgen tásilmen jansyzdandyrýǵa jol berilmeıdi», - deıdi basqarmadan.